Qutqarýshylar Túrkııadan aman-esen oralǵan soń mindetti túrde marapattalady

KÓKShETAÝ. QazAqparat – Túrkııadan aman-esen oralǵan soń qutqarýshylar mindetti túrde marapattalady. Bul týraly Prezıdent Qasym-Jomart Toqaev M. Ǵabdýllın atyndaǵy Azamattyq qorǵaý akademııasynda sóılegen sózinde aıtty, dep habarlaıdy QazAqparat Aqordaǵa silteme jasap.

«Jaqynda Túrkııada joıqyn jer silkinisi bolǵanyn bilesizder. Meniń tapsyrmammen baýyrlas Túrkııa eline qutqarýshylar jáne dárigerler jiberildi. Olardyń arasynda Aqmola oblysynyń mamandary da bar, ıaǵnı 18 adam. Bizdiń qutqarýshylar birneshe adamdy aman alyp shyqty. Túrkııada kúndiz-túni jumys istep jatqan azamattarymyzǵa alǵys aıtamyn! Túrkııadan aman-esen oralǵan soń olardy mindetti túrde marapattaımyz», - dedi Prezıdent.

Eske salsaq, 7 aqpan kúni Qazaqstan TJM qutqarýshylary Almatydan jer silkinisi saldaryn joıýǵa kómek kórsetý úshin Túrkııaǵa attandy. Olar 14 kúnge deıin avtonomdy jumys isteı alady.

8 aqpan kúni qazaqstandyq qutqarýshylardyń ekinshi eshelony – jeke quramnan 60 adam, olardyń ishinde TJM qutqarýshylary, Apattar medıtsınasy ortalyǵynyń dárigerleri, kınologııalyq esepter attandy.

Qazaqstandyq qutqarýshylar Túrkııada izdeý-qutqarý jumystaryn júrgize bastaǵaly 7 adamdy qutqaryp, medıtsına qyzmetkerlerine tapsyrdy. Sondaı-aq, qaıtys bolǵan 80 adamnyń denesin úıindi astynan shyǵardy, olardyń jeteýi – bala.

Aıta ketsek, búgin Prezıdent Qasym-Jomart Toqaev Túrkııa Respýblıkasyna qosymsha gýmanıtarlyq kómek jiberý jóninde Úkimetke tapsyrma berdi.