Qutqarýshylar saıabaǵynda Asqar Zabıkýlınge estelik taqtaısha ornatyldy

ASTANA. QazAqparat – Elordadaǵy Qutqarýshylar saıabaǵynda 2022 jyly qyzmet babynda erlikpen qaza tapqan órt sóndirýshi Asqar Zabıkýlınge arnalǵan estelik taqta ornatyldy. Bul týraly QazAqparat Tótenshe jaǵdaılar mınıstrligine silteme jasap habarlaıdy.

2022 jylǵy 16 qarashada 10 saǵat 43 mınýtta «101» tetigine Astana qalasyndaǵy «Qaharman» turǵyn úı keshenindegi (B. Momyshuly dańǵyly, 14) órt týraly habarlama túsedi. Ashyq jalynmen 11-qabattaǵy 50 sharshy metr bolatyn páter janyp jatqany anyqtaldy.

Qoıý tútin paıda bolyp, páterlerde jáne saty alańdarynda bolǵan adamdar óz betterinshe syrtqa shyǵa almaǵan.

Birinshi kezekte otpen kúresýshiler sheshýshi baǵyt retinde adamdardy qutqarýdy tańdady. Sóıtip, A. Zabıkýlın 12-qabatta ornalasqan terezeden qutqarý arqany kómegimen janyp jatqan páterge (11-qabatqa) tústi.

Eki adamdy áriptesteri buzyp úlgergen kireberis esik arqyly alyp shyqty. Sodan keıin kórshi páterge júgirip kirip, qalyń tútin arasynan 10 jastaǵy balany qutqardy.

Asqar Zabıkýlın denesiniń 80%-ǵa jýyq termııalyq kúıigimen №1 kóp beıindi qalalyq aýrýhanaǵa jetkizildi. Dárigerler onyń ómiri úshin birneshe kún kúresti, biraq ol 20 qarashada aýrýhanada kóz jumdy.

Qyzmettik boryshyn oryndaý jáne adamdar ómirin qutqarý kezinde kórsetken erligi men óz isine berilgendigi úshin, azamattyq qorǵaý kapıtany Asqar Serikuly Zabıkýlın І dárejeli «Aıbyn» memlekettik nagradasymen marapattaldy.

Estelik taqtanyń ashylýynan keıin departament bólimsheleriniń jeke quramy sap túzep, jazǵy arnaýly kıimge aýysýǵa tolyq daıyndyǵyn kórsetti. Astana qalasy TJD bastyǵy Qýanar Bazarbaev saptyq daǵdylar deńgeıin, bólimshelerdiń úılesimdiligin, syrtqy kelbetin, kıim nysanyn, qyzmettik kýálikterdiń, jeke nómirleri bar jetondardyń, TJD jáne Órt sóndirý qyzmeti jeke quramy belgileriniń bolýyn tekserdi.

Sondaı-aq, 16 jas qyzmetker saltanatty túrde ant qabyldady.