Qutqarýshylar kóktemgi sý tasqynyna daıyndyqtaryn tekseredi

ASTANA. QazAqparat - 5-6 naýryzda Óskemen qalasynda «Kóktem-2018» respýblıkalyq komandalyq-shtabtyq oqý-jattyǵýy ótkiziledi, dep habarlaıdy QazAqparat «Kóktem-2018»  RKSh OJ respýblıkalyq jedel shtabyna silteme jasap       

Oqý-jattyǵýdyń maqsatyna sáıkes ortalyq jáne jergilikti atqarýshy organdardyń ózara is-qımyly men jergilikti halyqty qulaqtandyrýy tekserilip, Azamattyq qorǵanys júıesiniń kóktemdegi TJ qateri tóngen kezde maqsatyna sáıkes mindetterdi oryndaýy úshin joǵary daıyndyq rejimine aýystyrý máselesin pysyqtaý kózdelip otyr.

Oqý-jattyǵýǵa ortalyq memlekettik organdardan (azamattyq qorǵanystyń respýblıkalyq qyzmetteri), jergilikti atqarýshy organdardan (tótenshe jaǵdaılardyń aldyn alý jáne olardy joıý jónindegi komıssııalar), azamattyq qorǵanystyń aýdandyq jáne qalalyq qyzmetteri, avarııalyq-qutqarý qyzmetteri, Qorǵanys mınıstrligimen kelise otyryp Ulttyq Ulannyń áskerı bólimderiniń jedel toptaryn tartý josparlanǵan.

5 naýryzda sý tasqyny qateri týyndaǵanda basqarý organdary men azamattyq qorǵanys kúshterin daıyndaýǵa sheshim qabyldaý jáne Azamattyq qorǵanystyń memlekettik júıesiniń basqarý organdary men kúshterin daıyndaýǵa sheshim qabyldaý boıynsha azamattyq qorǵanystyń qyzmetteri shtabtyq jumys júrgizetin bolady.

6 naýryzda barlyq oblystar men Astana jáne Almaty qalalarynda kóktemgi TJ-dan saqtanýǵa qatysty avarııalyq-qutqarý qyzmetteri azamattyq qorǵanystyń oblystyq qyzmetterimen birlesip arnaıy- taktıkalyq oqý-jattyǵý ótkizetin bolady.

Praktıkalyq is-qımyldardy pysyqtaý aldyńǵy jyldary sý basqan eldi mekenderde ótedi. Bul jasaqtardyń sý alyp ketken jerlerde sý tasqynyna qarsy is-sharalardy ótkizip, jattyǵýdy júzege asyrýǵa múmkindik beredi.

Sapaly áreket etýdi pysyqtaý jáne aldyn alý sharalary tasqyn sýdan keletin zalaldy tómendetýge múmkindik beredi.