Qutqarýshylar eskertedi: Órtke jıi ákelip soǵatyn 7 sebep
ShQO Tótenshe jaǵdaılar departamenti baspasóz qyzmetiniń málimetine súıensek, 2021 jyldyń basynan beri óńirde otty abaısyz paıdalanýdan – 96, peshti paıdalaný kezinde órt qaýipsizdigi erejelerin saqtamaýdan – 122, elektr jabdyqtarynyń aqaýy saldarynan 87 órt shyqqan.
Osy rette, qutqarýshylar órtke jıi ákelip soǵatyn 7 sebepti atady:
1. Qaraýsyz qaldyrylǵan maısham nemese otty abaısyz paıdalaný. Maıshamdy úı janýarlary qaǵyp ketýi múmkin. Sondyqtan sham qoıǵyshty qoldanǵan jón. Sondaı-aq bólmeden shyqqan kezde shamdardy sóndirýdi umytpańyz. Janyp turǵan maıshamdy 3 mınýtqa da qaraýsyz qaldyrýǵa bolmaıdy.
Temeki shegý kezindegi abaısyzdyq – órt shyǵýynyń eń jıi kezdesetin sebebi. Kóbinese mundaı jaǵdaıǵa ishimdikke masaıǵan adamdar tap bolyp jatady.
2. Pisip jatqan tamaq. Tamaq ázirleý turǵyn úıdi qyzyl jalyn sharpýynyń basty sebepteriniń biri. Kóbinese tamaq pesh ústinde qaraýsyz qalǵanda órt bolady.
3. Uzartqyshtardy qoldaný. Symdar bir-birine qosylǵan kezde olardyń shamadan tys júktelýi oryn alady. Bul qysqa tuıyqtalýǵa nemese órtke ákelip soǵýy múmkin. Eger sizge kóbirek rozetka qajet bolsa, bilikti elektrshige habarlasyńyz. Uzartqysh symdardy turmystyq tehnıkany qysqa ýaqytqa qosý úshin ǵana paıdalaný kerek jáne olardy únemi qosýǵa bolmaıdy. Sonymen qatar uzartqysh kilemder men esikterdiń astynan ótpeýi tıis. Ony paıdalanyp bolǵannan keıin birden uzartqyshty rozetkadan sýyrý qajet.
4. Zaqymdalǵan symdardy paıdalaný. Qandaı da bir aqaýy bar symdardy qoldaný toq soǵýǵa ákelýi múmkin. Sonymen qatar symdardyń qyzýy tutanatyn zattarmen janasqanda órt qaýpin arttyrady. Esińizde bolsyn, órt 30 sekýndtan az ýaqyt ishinde lap etedi, kishkentaı ǵana jalyn alapat órtke aınalady. Ushqyndar nemese rozetkanyń qyzyp ketýi álsiz baılanystyń saldarynan bolýy yqtımal. Bul jaǵdaıda rozetkany aýystyrǵan jón. Óıtkeni saqtandyrǵyshtar qysqa tuıyqtalýdan ǵana qorǵaıdy.
5. Turmystyq tehnıkany bir orynǵa úıip tastaý. Elektr qurylǵylarynyń aınalasynda bos oryn qalmaǵan kezde, olardan shyǵatyn jylýdyń ketetin jeri bolmaıdy. Barlyq elektr aspaptary uzartqyshtardy paıdalanbaı, qabyrǵadaǵy elektr rozetkasyna tikeleı qosylýy tıis. Eger rozetkaǵa bir ýaqytta birneshe jylý bóletin qurylǵy qosylǵan bolsa, elektr jelisiniń shamadan tys júktelýi nemese elektr aspaptarynyń tutaný qaýpi týyndaıdy.
6. Qosylyp, qaraýsyz qaldyrylǵan elektr jabdyqtary. Eshqashanda elektr quraldaryn qaraýsyz qaldyrmańyz. Ásirese úıden bir jaqqa shyǵyp bara jatqanda abaı bolǵan jón.
7.Peshti ýaqtyly tazalamaý. Peshti paıdalaný kezinde murjany tazalap otyrý qajet. Kúldi tolyqtaı salqyndaǵansha qoqysqa tastamańyz. Kúldiń oty qalmaǵanyna kóz jetkizý úshin oǵan sý quıyp tekserińiz.