Qutqarýshylar Aıýsaı shatqalynan aýstralııalyq týrıstiń denesin tapty

ALMATY. QazAqparat - Respýblıkalyq jedel-qutqarý jasaǵy Almaty taýlarynda joǵalyp ketken Aýstralııa azamatynyń denesin Aıýsaı shatqalynan tapty, dep habarlaıdy QazAqparat tilshisi.

Respýblıkalyq jedel-qutqarý jasaǵynyń málimetinshe, 21 mamyr kúni 1995 jyly týǵan Aýstralııa azamaty Úlken Almaty shatqalyna qaraı ketken. Polıtsııa departamentine onyń joǵalyp ketkenin hostelde birge turǵan Reseı azamaty habarlaǵan.
Onyń aıtýynsha, olar Almatyǵa 20 mamyr kúni tańerteń týrıstik maqsatta kelgen. 22 mamyrda tańǵy saǵat 7-de týrıster keri ushyp ketýi kerek bolǵan, biraq qurbysy áýejaıǵa jalǵyz barypty.
Týrısti izdeýge 6 adamnan turatyn respýblıkalyq jedel-qutqarý jasaǵynyń jedel qutqarý toby jáne 1 kınologııalyq esep jiberildi, saǵat 23.40-ta olar izdeýge kiristi.
Saǵat 2:40-ta qutqarý jasaǵy qyzmetkerleri men Polıtsııa departamenti qyzmetkerleri Ǵarysh stantsııasyna kóterilip, betkeıdi tekserdi. Olar tómen túsip, qubyrdyń oń jáne sol jaǵyn tekserdi. Olar kóldiń oń jaǵyn qarap, joǵalǵan adamdy tappady.
Úlken Almaty kólinde túnde aýa raıy qolaısyz bolyp, jańbyr, qar jaýyp, qatty jel soǵyp turdy. Saǵat 10:45-te taǵy bir qutqarýshylar toby aýysymǵa keldi, olar saǵat 11:15-te ǵarysh stantsııasynan izdeýdi jalǵastyrdy.
Qutqarýshylar eki topqa bólindi: bir top Aıýsaı shatqalyna, ekinshisi Prohodnoe shatqalyna qaraı izdeýge shyqty. Іzdeý kúni boıy, aýa raıy qolaısyz bolsa da júrgizildi.
«Saǵat 15:48-de TJM respýblıkalyq jedel-qutqarý jasaǵy jedel qutqarý bólimshesiniń basshysy Baýyrjan Arystanbaev spýtnıktik baılanys boıynsha aqparat berdi. Respýblıkalyq jedel-qutqarý jasaǵynyń jedel qutqarý toby Almaty qalasy ákimdiginiń qutqarý qyzmetimen birlese otyryp, Aıýsaı shatqalyndaǵy alǵashqy sarqyrama mańynan deneni tapqan», - dep habarlady TJM RJQJ baspasóz qyzmetinen.

Almaty qalasy Almaly aýdandyq polıtsııa basqarmasynyń bastyǵy Esen Ysqaqovtyń aıtýynsha, tabylǵan týrıstiń denesinde zorlyq-zombylyq belgileri joq.«1995 jyly týǵan Herd Jake Michael-dyń denesi tabyldy. Jeke zattary ózimen birge boldy. Kisi óliminiń sebebin anyqtaý maqsatynda sot-medıtsınalyq saraptama taǵaıyndaldy», - dedi Almaly aýdandyq Polıtsııa basqarmasynyń bastyǵy Esen Ysqaqov.
Buǵan deıin Almaty taýlarynda joǵalyp ketken aýstralııalyq týrıstiń izdestirilip jatqanyn habarlaǵan edik.
Keıin sheteldik týrıstiń joǵalyp ketý deregi boıynsha izdestirý isi qozǵaldy.