Qutqarýshylar Almaty taýlarynda aıaǵyn syndyryp alǵan týrısti qutqardy

ALMATY. QazAqparat - Respýblıkalyq jedel-qutqarý jasaǵy taýda aıaǵyn syndyryp alǵan er adamǵa kómek kórsetti, dep habarlaıdy QazAqparat tilshisi.

5 maýsym saǵat 12:57-de TJM Respýblıkalyq jedel-qutqarý jasaǵynyń kezekshi-dıspetcherlik bólimine er adamnyń Prohodnoe shatqalynda aıaǵyn syndyryp alǵany jáne ony tasymaldaý qajettigi týraly habarlama tústi. Oǵan kómek kórsetý úshin respýblıkalyq jedel-qutqarý toby jolǵa shyqqan.

«Zardap shekken adamǵa alǵashqy medıtsınalyq kómek kórsetilip, aıaǵy shınanyń kómegimen bekitildi. Keıin ol zembilge jatqyzylyp, TJM Apattar medıtsınasy ortalyǵynyń brıgadasyna tapsyrý úshin tómenge túsirildi», - delingen habarlamada.

Qutqarýshylar taýda qaýipsiz demalý erejelerin eske salady.«Tik shópti betkeıler men shógindi jerlerge kóterilýge bolmaıdy, aıaqtyń astyna muqııat qaraý qajet. Joldy qysqartýǵa bolmaıdy. Ystyq kúni ózińizben mindetti túrde sý, kózildirik, bas kıim jáne kúnnen qorǵaıtyn jaqpa maı bolýy kerek», - dep atap ótti vedomstvodan.