Qutqarýshylar 10 jyl buryn ózderi qudyqtan aman alyp shyqqan jasóspirimmen kezdesti

NUR-SULTAN. QazAqparat – Oblystyq TJD baspasóz qyzmetiniń málimetinshe, jetkinshekke jańa oqý jyly qarsańynda mektepke kerekti shaǵyn jıyntyq pen sport sómkesi tabystaldy, dep habarlaıdy QazAqparat Pavlodarnews-ke silteme jasap.

Balalar jyly jáne «Mektepke jol» aktsııasy aıasynda Pavlodar oblysy Jelezın aýdany TJB bastyǵynyń m.a., azamattyq qorǵaý kapıtany Bahtııar Іlııasov pen azamattyq qorǵaý starshınasy Erjan Ýspanov Bashmachnoe aýylynda turatyn Volodıa esimdi jasóspirimmen kezdesti.

Bashmachnoe aýylynyń kishkentaı turǵyny Volodıanyń ómirinde 13 - mańyzdy sandardyń biri. Ol 13 qazanda dúnıege kelgen, biraq onyń ekinshi týǵan kúni 13 tamyz dese bolady.

«Dál osy kúni, 10 jyl buryn, 1 jyl 10 aı ǵana bolǵan kishkentaı bala qudyqqa túsip ketken. Dálirek aıtsaq, dıametri 22 santımetr bolatyn myryshtalǵan qubyrdyń ishinde qalady. Qutqarýshylar, kórshiler men eriktiler 6 metr tereńdiktegi tar qubyrda turyp qalǵan balany aman alyp qalý úshin bir saǵat ishinde qudyqtyń janynan úlken or qazady. Osydan keıin qutqarýshylar bir metrge tereńdep, bala odan da tómen túspeýi úshin qubyrǵa armatýrany salady. Sodan keıin olar lıýkti kese bastaıdy», - deıdi departament ókilderi.

Myryshtalǵan metalldy kesý kezinde ýly tútin bólingen, biraq ol balany qutqarýǵa kedergi bolmady. Qutqarý operatsııasy 4 saǵatqa sozyldy.

«Kóshede qarańǵy túsken kezde qutqarýshy serjant Erjan Ýspanov moınynan barlyq kúshimen qysyp ustap alǵan balany aman alyp shyqty. Osylaısha, Volodıa aman qalǵan. Qazir ol sportpen shuǵyldanady. Al, qudyq bolsa, óz ornynda tur. Eshteńe ózgergen joq. Tek qazir ol jastyqpen emes, plastıkalyq qaqpaqpen jabylǵan», - deıdi departament mamandary.