Qutqarýshy Túrkııadaǵy zilzala týraly: Shynymen osyndaı jaǵdaı bolyp jatqanyna sengiń kelmeıdi

ASTANA. QazAqparat – Astana qalasy tótenshe jaǵdaılar departamenti jedel qutqarý jasaǵynyń bas qutqarýshysy Rahat Kendibaev QazAqparat tilshisine apat saldaryn joıý kezinde tap bolǵan tosyn jaıttar týraly aıtyp berdi.

«Túrkııaǵa kelgen boıda arnaıy shtabqa bardyq. Sol jerde atqaratyn jumysymyzdyń egjeı-tegjeıin bildik. Apat bolǵan jerge barǵanda kınoǵa tap kelgendeı sezim boldy. Shynymen osyndaı jaǵdaı bolyp jatqanyna sengiń kelmeıdi. 7-8 qabatty záýlim úıler jermen-jeksen bolǵan. Adamdarǵa aıanyshsyz qaramaý múmkin emes. Bári shatyrlardy panalap júrdi. Alǵashqy úsh kúnde 24 saǵattan jumys istedik. Barǵan kúni-aq úsh adamdy úıindi astynan tiri alyp shyqtyq. Onyń bireýi er adam, ekeýi áıel bolatyn. Áıelderdiń biri egde jastaǵy kisi eken», - dep eske alady qutqarýshy.

Sondaı-aq, ol úıindi astynan balalardyń denesin alyp shyǵýdyń psıhologııalyq salmaǵy aýyr bolǵanyn aıtady.

«Kez kelgen adam mundaıdy kórgende psıhologııalyq zaqym alýy múmkin. Biraq biz tosyn jaıttarmen únemi ushyrasatyndyqtan, ondaıǵa tózimdilik qalyptasady. Onyń ústine qansha qınalyp tursaq ta, ondaǵy adamdarǵa óz emotsııamyzdy kórsetpeýimiz kerek. Ásirese úıindi astynan jas balalardyń, áıelderdiń denesin alyp shyǵý aýyr tıdi», - deıdi Rahat Kendibaev.