Qutqarýshylarymyz kásibı sheberlikterin shetelde de kórsetti - Syrym Sháriphanov

<p>Búgin Qazaqstanda Qutqarýshylar kúni. Ataýly kún elimizde Tótenshe jaǵdaılar jónindegi ortalyq memlekettik komıtettiń qurylýyna baılanysty bekitilgen. <a href="https://kaz.inform.kz/" target="_blank" rel="noopener">Kazinform</a> tilshisine kásibı mereke qarsańynda Tótenshe jaǵdaılar mınıstri Syrym Sháriphanovpen suhbattasýdyń sáti túsken edi.</p>

- Syrym Dúısenǵazyuly, salada maman tapshylyǵy baryn bilemiz, máseleni sheshý úshin qandaı sharalar atqarylyp jatyr?

- Maman jetispeýshiligi bar. Onyń ústine, qalalar, eldi mekender keńeıip, halyq sany ósip jatyr. Qazirgi tańda Memleket basshysynyń jáne Úkimettiń qoldaýymen bizge 900 shtat berildi. Bul – máseleniń oń sheshimi.

Osy rette qutqarýshylarymyzdyń kásibı biliktilikteri men sheberlikterin atap ótkim keledi. Máselen, Túrkııada bolǵan jer silkinisi kezinde bizdiń qutqarýshy mamandar kómekke barǵanyn bilesizder. Sonda jergilikti halyq qazaqstandyq qutqarýshylardyń eńbekterine tánti boldy. Sheteldik qutqarýshylar ózderine ǵana tıesili mindetti jáne ár toby belgilengen ýaqytta ǵana atqarsa, bizdiń mamandar jan-jaqty, kóp baǵytta jumys isteı alady. Bir-birin almastyryp, kún bolsyn, tún bolsyn jumystaryn jankeshtilikpen atqarady. Zardap shekkender kómek suraǵan kezde árdaıym daıyn turady. Óz ádis-tásilderi de bar. Osylaısha, eńbekterine degen adaldyqtary men adamdarǵa kómektesýge degen qulshynystary, batyl áreketteri joǵary baǵalanyp, alǵys arqalap qaıtqan bolatyn. Júıemizge túsken synaqty abyroımen ótkerdi, sondyqtan bizdiń qutqarýshylar osyndaı dep maqtanyshpen aıtýymyzǵa bolady.

- Jýyrda qazaqstandyq qutqarýshylar zilzala bolǵan Aýǵanstan aýmaǵynda jumys istep qaıtty...

- Iá, Memleket basshysynyń tapsyrmasy boıynsha Aýǵanstanǵa gýmanıtarlyq kómek kórsetý úshin dereý qutqarý tobyn jiberdik. Qutqarýshylar ózimizdiń ushaqpen baryp, sol jerde birden jumysqa kiristi. Barlyǵy 45 maman bardy, onyń ishinde 40 qutqarýshy jáne 5 medıtsına qyzmetkeri bar. Bizdiń mamandar ártúrli kómek kórsetti, medıtsınalyq jáne úıindilerdiń astynda qalǵan adamdardy alyp shyǵý jumystarymen aınalysty. Ókinishke qaraı, úıindiler astynan tiri adamdy alyp shyǵý múmkindigi bolmady.

- Qazir álem jurtshylyǵy Izraıl men Palestına qaqtyǵysyna alańdap otyr. Qazaqstan bul elderge qutqarýshylardy jiberýi múmkin be?

- Bul másele bizdiń quzyretimizge jatpaıdy, árıne. Memleket basshysy men Úkimet sheshedi. Al biz qandaı tapsyrma beredi sony oryndaýǵa daıynbyz.

- Qutqarýshylar tótenshe oqıǵalar kezinde ǵana emes, olardyń aldyn alý boıynsha da jumys isteıdi. Osy sharalardyń tıimdiligin arttyrý boıynsha qandaı josparlar bar?

- Túrli eskertýler jasalyp jatsa da, qulaq aspaıtyn adamdar bolady. Kún raıynyń qolaısyzdyǵyna baılanysty habarlamaǵa qaramastan jolǵa shyǵady. Kópqabatty turǵyn úılerde kishkentaı balalar qaraýsyz qalady. Tyıym salynǵan jerde sýǵa túsedi, balyq aýlaıdy... Mundaı problema bar.

Biz aqparattandyrý sharalaryn toqtatpaımyz. Tótenshe jaǵdaılar men qaıǵyly oqıǵalardyń aldyn alý baǵytynda aýqymdy jumys júrgizilip jatyr. Túsindirý jumystary kezinde ártúrli kontent, ártúrli tásildi qoldanamyz. Adamdardy qyzyqtyratyndaı etip túsindirý jaǵyna nazar aýdarylyp otyr. Árdaıym statıstıka usynylady. «Shok kontent» degen tásil bar, ol da qoldanylyp jatyr.

Aldaǵy ýaqytta eskertýlerdi elemeıtinderge aıyppul salý sharasy qarastyrylady. Josparda bar, tek máseleni jan-jaqty zertteý kerek. Bar kúshimizdi adamdardyń qaýipsizdigin qamtýǵa salyp jatyrmyz.

- Suhbatyńyzǵa rahmet.