Qutqarýshy vıdeolary arqyly kópshilikke Qarqaraly tabıǵatyn pash etip júr

<p>QARAǴANDY. KAZINFORM - Qaraǵandy oblysy Qarqaraly aýdanynyń týmasy Oljas Tóleýbektiń shyǵarmashylyqqa esh qatysy bolmasa da, sońǵy birneshe aıda ol týǵan ólkesi jaıly ádemi beınerolıkter túsirip, ony tanymal etýge zor úlesin qosyp keledi, dep habarlaıdy Kazinform tilshisi.</p>

Oljas Qarqaraly qalasynyń №16 órt sóndirý bóliminde bólimshe komandıri qyzmetin atqarady. Jasy 31-de, otbasyn quryp, bir bala tárbıelep otyr.

Mektep bitirgen soń Qaraǵandy Joǵary polıtehnıkalyq kolledjin «qutqarýshy» mamandyǵy boıynsha bitirgen. Qolyna dıplomyn alǵan bette, týǵan aýylyna oralǵan. Birneshe jyldan beri oqyǵan mamandyǵy boıynsha qyzmet atqaryp keledi.

Qarqaralynyń qalyń ormandary men asqar taýlaryn kórip ósken Oljas bul sulýlyqty qalaısha kópshilikke kórsetsem eken dep oılanǵanyna biraz bolypty. Osydan birneshe aı buryn sol armanyn júzege asyrmaqshy bolyp, kvadrokopter satyp alyp, beıne rolıkter túsire bastaǵan.

«Beınerolıkter túsirip júrgenime bir jyl bolǵan joq. Mamyrda bastaǵanmyn. Arnaıy osyndaı beıne túsirý úshin dron satyp aldym óz qarajatyma. Intsagramnan qanshama blogerler jáne dronmen beıne túsiretin operatorlardyń jumystaryn kórip, qyzyǵatynmyn. Kóbine Almaty men Astananyń vıdeoblogerleri unaıdy. Solardyń jumystaryna qarap, ózimniń týǵan ólkemdi túsirgim keldi. Bizdiń ólkeniń, Qarqaralynyń tabıǵaty keremet! Jergilikti týrızmniń damýyna úlesimdi qosqym keldi. Dronmen beıne túsiretin belgili blogerden kýrs satyp alyp, kvadrokoptermen jumys isteýdi, túsirgen beınemniń túsin retteýdi úırendim. Ol kýrsty da óz qarajatyma satyp aldym», - deıdi Oljas.

Onyń aıtýynsha, áleýmettik jelide jarııalaǵan beınerolıkterdi https://www.instagram.com/p/C6ULdKJrCw5/ Qarqaralynyń burynǵy turǵyndary kórip, kóńilderi bosap, týǵan jerine degen saǵynyshyn jetkizedi eken. 

Alaıda eń bastysy – Qarqaralynyń sulý tabıǵatyna tánti bolǵandar sany kóbeıip kele jatqanynda.

«Áleýmettik jelilerde jekeme de, jarııalanym astyndaǵy pikirlerde de Qarqaralynyń týmalary, basqa qalaǵa kóship ketken jerlesterimiz «osyndaı beınerolıkterdi kóbirek túsirshi, aýlymyzǵa degen saǵynyshymyzdy, maýqymyzdy basamyz» dep jazyp jatady. Arasynda meniń túsirgen beınemdi kórip, tabıǵatymyzǵa qyzyǵyp, Qarqaralyǵa arnaıy kelgender de bar. Bul bizde týrıstik áleýettiń joǵary ekenin kórsetedi», - deıdi Oljas Tóleýbek.

Aldaǵy ýaqytta ol qymbatyraq dron satyp alýdy armandaıdy. Sebebi bastapqyda hobbı bolǵanymen, onyń túsirip jatqan dúnıesi týǵan jerin  tek Qazaqstanda ǵana emes, shet elde de tanymal etedi degen senim nyǵaıyp keledi. Áleýmettik jelide #Qazalemi heshtegimen shyqqan baıqaý da buǵan túrtki bolar degen úmit bar.

Eske salsaq, elimizde #Qazalemi heshtegimen konkýrs jarııalanǵan bolatyn. Baıqaýǵa kez kelgen qazaqstandyq qatysa alady. Sharty da qarapaıym: qatysýshy áleýmettik jelide óz paraqshasynda týǵan jeriniń sulýlyǵyn kórsetetin beıne rolık nemese fotosýret salyp, #Qazalemi heshtegin qoıýy tıis.