Qutqarý jasaǵynyń jetekshisi almatylyqtarǵa zilzala kezinde ne isteý kerektigin aıtty

ALMATY. QazAqparat - Respýblıkalyq jedel-qutqarý jasaǵynyń basshysy Vladımır Tsoı almatylyqtarǵa jer silkinisi kezindegi qaýipsizdik sharalaryn túsindirdi, dep habarlaıdy QazAqparat tilshisi.

«Turǵyndarǵa mynany usynar edim: eger jer silkinisi bolsa, negizgi ishki qabyrǵanyń janyna, negizgi qabyrǵanyń buryshyna, esiktiń jaqtaýyna nemese negizgi tireýishtiń janyna turý kerek. Lıft paıdalanýǵa tyıym salynady. Sondaı-aq, jýyný bólmesindegi vanna jaqsy qutqarady, ásirese shoıyn vannalary», - dedi spıker óńirlik kommýnıkatsııalar qyzmetinde ótken brıfıngte.

Respýblıkalyq jedel-qutqarý jasaǵynyń basshysy seısmıkalyq aýdanda turatyn adamdardyń saqtyq sharalaryn bilýi jáne «dabyl sómkesiniń» bolýy kerektigin atap ótti.

«Qujattar, fonar, jyly kıim, aýyz sý, tez buzylmaıtyn azyq-túlik, alǵashqy medıtsınalyq kómek kórsetý qobdıshasy bolýy kerek», - dedi ol.

Vladımır Tsoı chemodanǵa ysqyryq salyp qoıýǵa keńes berdi.

«Adam úıindi astynda qalǵanda, ol birneshe kún aıǵaılaıdy, kómekke shaqyrady. Biraq bir-eki kúnnen keıin onyń kúshi taýsylady. Qutqarýshylar olardy tez taýyp alýy úshin ysqyryq qajet. Túrkııada adamdardy qutqarǵan kezde bizde arnaıy qurylǵylar boldy. Itimiz qıraǵan aýmaqta áli tiri adamdar bar ekenin kórsetkende úıindilerdi buzyp óte bastadyq, qurylǵymen izdeý júrgizildi. Osy qurylǵylardyń kómegimen adamdardyń tynys alýyn, júrekteri qalaı soqqanyn estidik. Sondyqtan ysqyryqtyń da mańyzy zor», – dedi spıker.