Kúshtik qurylymdar arasyndaǵy rýhanı jańǵyrý baıqaýy qorytyndylandy

ASTANA. QazAqparat - Astanada «Rýhanı jańǵyrý - patrıotızm negizi» atty taqyrypta kúsh-qýat qurylymdary arasynda ótken respýblıkalyq vedomstvoaralyq baıqaý qorytyndylandy. Dástúrge aınalǵan atalmysh shara bıyl úshinshi ret ótkizilýde, dep habarlady QR Bas prokýratýrasynyń baspasóz qyzmeti.

Baıqaýdyń negizgi maqsaty - Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn nasıhattaý men patrıottyq rýhty kúsheıtýge qadam jasaý.

Qazaqstan Respýblıkasy Bas prokýratýrasynyń bastamasymen jáne Prezıdent Ákimshiliginiń, Mádenıet jáne sport mınıstrliginiń Tilderdi damytý komıtetiniń qoldaýymen ótkizilip jatqan sharany QR Memlekettik hatshysy Ábdiqalyqova Gúlshara Naýshaqyzy ashty. Ol respýblıkalyq deńgeıde ótkizilip otyrǵan sharanyń mańyzdylyǵyna toqtala kele barlyq komandalarǵa sáttilik tiledi.

Shara qonaqtarynyń qatarynda QR Prezıdent Ákimshiliginiń ókilderi, Konstıtýtsııalyq Keńes músheleri, Parlament depýtattary, sondaı-aq quqyq qorǵaý men memlekettik organdardyń ókilderi boldy.

Baıqaýǵa - Bas prokýratýra, Ulttyq qaýipsizdik komıteti, Іshki ister mınıstrligi, Qorǵanys mınıstrligi, Memlekettik qyzmet isteri jáne sybaılas jemqorlyqqa qarsy is-qımyl agenttigi, Memlekettik kúzet qyzmeti ókilderinen qurylǵan 6 komanda qatysty.

Komandalar 2 aınalym boıynsha saıysqa túsip, baq synasty. Birinshisi - memlekettik organnyń qyzmeti jáne rýhanı jańǵyrý aıasyndaǵy atqarylyp jatqan naqty isterge negizdelgen tanystyrý men beınebaıan syndy eki bólimnen tursa, al ekinshisi - «Rýhanı jańǵyrý - patrıotızm negizi» sahnalandyrylǵan kórinisten turdy.

Saıysty tamashalaýǵa kelgen qaýym komandalardyń shyǵarmashylyǵyna ábden qanyq boldy.

Árbir vedomstvonyń ókilderi memlekettik tildi jetik biletinin, ony kásibı qyzmette qoldaný daǵdylaryn ári sheberlikterin ózara synǵa saldy.

Baıqaýdyń qorytyndysy boıynsha bas júldeni - Memlekettik qyzmet isteri jáne sybaılas jemqorlyqqa qarsy is-qımyl agenttigi, Birinshi oryndy - Qorǵanys mınıstrligi, Ekinshi oryndy - Bas prokýratýra jáne Memlekettik kúzet qyzmeti, Úshinshi oryndy - Іshki ister mınıstrligi jáne Ulttyq qaýipsizdik komıteti komandalary ıelendi.

Baıqaý qorytyndysy boıynsha jeńimpazdar baǵaly syılyqtarmen marapattaldy. Baıqaýdyń jekelegen aınalymdarynda erekshe kózge túsken qatysýshylar túrli nomınatsııalar boıynsha alǵys hatpen yntalandyryldy.