Kúshti jel: Atyraý-Oral áýe reısi ushpaı qaldy

<p>ORAL. KAZINFORM &mdash; Qolaısyz aýa raıyna baılanysty Oralǵa kelýi tıis reıster eki kúnnen beri keshigip ne toqtatylyp jatyr.</p>

«Oral halyqaralyq áýejaıy» JShS-nyń baspasóz hatshysy Aınagúl Saqposynovanyń aıtýynsha, keshe 5 reıs bolsa, sonyń úsheýi toqtatylǵan edi.

Búgin 4 reıstiń bireýi kelmeıtin boldy. Atap aıtqanda, jeldiń ekpini sekýndyna 17 metrge deıin jetýine baılanysty Atyraýdan túske deıin kelýi tıis reıs toqtatyldy.

«Air Astana áýe kompanııasynyń keshe toqtatylǵan 319/937 Maındaǵy Franfýrt-Astana-Oral reısiniń búgin de ushpaıtyny jóninde habar keldi. Al 7365 Astana-Oral reısi ýaqtyly dep tur, biraq belgisiz. Óıtkeni Astanada da jel kúsheıgen. Sondaı-aq Almatydan keletin 881 jáne 7165 reısteri keshigip jatyr», dedi A.Saqposynova.

Eske sala keteıik, budan buryn Oral qalasynda qatty jelge baılanysty ushaqtar keshigip jatqanyn jazǵan bolatynbyz.

Sondaı-aq Batys Qazaqstanda qolaısyz aýa raıyna baılanysty 11 jol bóligi jabyq tur.