Kúshimiz birlikte: Almatyda kúndelikti eki myń adamǵa taǵam daıyndalyp, taratylýda

ALMATY. QazAqparat - Almatyda áskerı qyzmetkerlerge, kommýnaldyq qyzmetkerlerge jáne oıran zardaptaryn joıýǵa atsalysýshylarǵa kómektesý úshin eriktiler bastamalary men qaıyrymdylyq aktsııalary belsendi túrde júzege asýda, dep habarlaıdy QazAqparat tilshisi.

Almatydaǵy «Rahym» áleýmettik úıi 10 kúnnen beri barlyq qyzmet jáne quqyq qorǵaý organdarynyń qyzmetkerlerine ystyq tamaq ázirlep, taratýda. Budan bólek, 6 qańtardan bastap kúnine 2 myńǵa jýyq adamǵa taǵam daıyndady. Bul týraly «Rahym» áleýmettik úıi» qoǵamdyq qorynyń jetekshisi Bıbinur Sheralıeva aıtty.

«Qala turǵyndary ıgi bastamany blogerler arqyly bilip, ony qoldap, barlyǵyn aýqymdy túrde uıymdastyrdy. Bul eń aldymen halyqtyń qýaty. Biz aktsııany 6 qańtarda bastadyq. Sol kezde men buqtyrylǵan makaron pisirdim, ol 130 portsııa boldy. Blogerlerge plastıkalyq ydystardy satyp alýǵa kómektesýleri úshin habarlastym. Jalpy, bul jumysty atqaryp júrgenime úsh jyl boldy. Qala qalpyna kelip jatqanda, bul bastamanyń aýqymdy aktsııaǵa aınalýyn, kún saıyn ystyq tamaq berýimizdi qalaımyn. Biz qala turǵyndaryna da habarlasa bastadyq. Biz áleýmettik úıde bir kúnde 2000 portsııa taǵam daıyndadyq. Úlken qazandar men azyq-túlikterdi aldyq. Turǵyndar da kómektese bastady. Mysaly, olar kartop, pııaz, sábizderdi úılerinde tazalady. Biz sondaı-aq jınalǵan ortaq aqshaǵa sıyr satyp aldyq. Jalpy, biz 6-nan beri jumys istep jatyrmyz, búgin týra 10 kún boldy. On kúnniń ishinde 12 myńnan astam portsııa taǵam daıyndadyq. Keshe biz 1680-in ázirledik», - dedi Bıbinur Sheralıeva.

Áleýmettik úıdiń basshysy ystyq tamaq Ulttyq ulan, ishki eshelon áskerlerine, arnaıy jasaq, Bostandyq jáne Medeý aýdandyq ishki ister bóliminiń qyzmetkerleri, kommýnaldyq qyzmetkerlerge, eriktiler, sondaı-aq, Almatyda qalǵan stýdentterge taratylyp jatqanyn aıtty.

«Budan bólek, birlese tamaq jáne sýsynmen qamtamasyz etý úshin biz demeýshilerdi de tarttyq. Qalanyń qaıyrymdy azamattary men qala turǵyndaryna rahmet. Biz bastadyq, blogerler men halyq bizdiń bastamamyzdy qoldady. Bizdiń kúsh-qýatymyz birlikte jáne turǵyndar oǵan kómektesip jatyr», - deıdi «Rahym» áleýmettik úıi» qoǵamdyq qorynyń basshysy Bıbinur Sheralıeva.

Sondaı-aq ol atalmysh aktsııa qala qalpyna kelgenshe jalǵasatynyn jetkizdi.