Kúsheıtilgen karantın: Almatydaǵy HQKO qalaı jumys isteıdi

ALMATY. QazAqparat - Almaty qalasy bas memlekettik sanıtar dárigeri Jandarbek Bekshınniń qaýlysyna sáıkes, halyqqa qyzmet kórsetý ortalyqtary 25 naýryzdan bastap klıentterdi tek aldyn ala jazylý boıynsha saǵat 09:00-den 18:00-ge deıin qabyldaıdy. Bul týraly «Azamattarǵa arnalǵan úkimet» memlekettik korporatsııasy Almaty qalasy boıynsha fılıaly málim etti, dep habarlaıdy QazAqparat tilshisi.

Kezekke egov.kz portaly, egov mobile, telegram-bot egovkzbot2.0 (@kenes1414bot) qosymshalary arqyly onlaın, sondaı-aq 1414 baılanys ortalyǵyna qońyraý shalý arqyly tapsyrys berýge bolady.

Qyzmet alýshy brondaý kezinde óziniń jeke derekterin kórsetip, óńirdi, HQO bólimin, kelý ýaqyty men kúnin tańdaý qajet.

«Almatylyqtar brondaý kezinde eger kópbalaly otbasylar, zeınetkerler nemese múgedektigi bar adamdar sanatyna jatatyn bolsa, jeńildik terezesin kórsete alady. Sondaı-aq, eger HQO-da bir ýaqytta birneshe memlekettik qyzmet túrin rásimdeý qajet bolsa, kóterme terezeni tańdaýǵa bolady. Azamattarǵa arnalǵan úkimettiń fılıaly HQO-ǵa brondalǵan ýaqyttan 10-15 mınýt buryn kelýdi jáne barlyq sanıtarlyq talaptardy saqtaýdy usynady. Sanıtarlyq dárigerdiń qaýlysy boıynsha senbi kúnderi halyqqa qyzmet kórsetý ortalyqtary jumys istemeıdi» delingen habarlamada.