Kúsh salsaq, kókpardy Olımpıada oıyndaryna engizýge bolady - Qaırat Satybaldy
Keńes otyrysynda sóz sóılegen QR Ulttyq sport túrleri qaýymdastyǵynyń qurmetti prezıdenti Qaırat Satybaldy ulttyq sport túrlerin damytý - biregeıligimiz ben tarıhı jáne mádenı ereksheligimizdi áıgileıtinin atap ótti.
«Ulttyq sportty damytý arqyly ulttyq kodymyzdy saqtaımyz. Adamdar, elder arasyndaǵy dostyq qarym-qatynas, mádenı baılanys halyqtarymyzdy jaqyndata túsedi. Ótken jyldyń qyrkúıek aıynda ıÝNESKO men dástúrli sport komıtetiniń keńes otyrysynda 130 eldiń ókilderi jınalyp, Qazaqstan elordasy - Astana qalasynda etnosporttan tuńǵysh ret álemdik oıyndardy ótkizý týraly sheshim qabyldanǵan edi. Sonymen birge, Qazaqstanda taǵy birshama halyqaralyq chempıonattar uıymdastyryldy. Atap aıtqanda, aýdaryspaq pen teńge ilýden, qusbegilikten Azııa chempıonaty, jamby atýdan halyqaralyq chempıonat ótti. Osynyń bári de - bizdiń birlese atqarǵan jumysymyzdyń arqasy», - dedi Qaırat Sabytaldy.
Onyń aıtýynsha, kókpar oıynyn kórshiles elder árqalaı ataıdy.
«Dese de, kókpar bárimizge ortaq. Onyń tek erejeleri boıynsha azdaǵan aıyrmashylyq bar. Búgingi jıyn kókpardy damytý jumysyna qosymsha serpin beredi degen senimdemin. Biz birige otyryp, kókpardy álemdegi tanymal sport túrine aınaldyra alamyz. Osyǵan deıin aıtylǵandaı, kúsh salsaq kókpardy Azııa oıyndarynyń, Olımpıada oıyndarynyń quramyna engizýge bolady», - dedi Qaırat Satybaldy.
Aıta ketsek, elordadaǵy Ulttyq mýzeıde álemniń 10 eliniń Ulttyq sport federatsııa basshylarynyń qatysýymen Búkilálemdik kókpar qaýymdastyǵynyń keńesi ótip jatyr. Keńeste qaýymdastyqqa jańa músheler qabyldanyp, halyqaralyq jarystardy uıymdastyrý tártibi qaralýda. Jıynda kókpardyń halyqaralyq erejeleri talqylandy.
Keńeske Qazaqstan, Majarstan, Túrkııa, Qytaı, Ózbekstan, Tájikstan, Aýǵanstan, Mońǵolııa, Qyrǵyz Respýblıkasy, Reseı ulttyq federatsııasynyń ókilderi qatysýda.