Qusbegilikten ótken jarystyń «Búrkit salý» sanatyndaǵy jeńimpazdarǵa avtokólik kilti tabystaldy
«Búrkit salý» sanatynda birinshi oryndy ulttyq qurama múshesi Serikbek Kúntýǵan «Alǵyr» qusymen ıelendi. 2 jattyǵý boıynsha ótken tartysty básekede ekinshi orynǵa «Zańǵar» qusymen Erzat Baıqadamov shyqsa, qola medaldi qusbegi Arman Qoshqarov «Naryn» atty búrkitimen enshiledi.
«Qarshyǵa salý» sanaty boıynsha birinshi oryndy «Naızatuıaq» qusymen astanalyq Qudaıbergen Raýıluly jeńip alsa, ekinshi orynǵa Qyrǵyzstan sportshysy – Adılbek Qudaıberdıev «Qaramonshaq» qusymen jaıǵasty. Al ulttyq quramamyzdyń taǵy bir sportshysy – Baǵdat Keýenov «Sombalaq» qarshyǵasymen qola medaldi qanjyǵasyna baılady.
«Itelgi salý» boıynsha «altyn» jáne «kúmis» medal júldegerleri – Bakyt Shamýratýly jáne Túgelbaı Abdykadyrov (Qyrǵyzstan), qola medal ulttyq qurama múshesi Baqdáýlet Babajannyń enshisinde.
Ulttyq sport túrin qoldaý jáne nasıhattaý maqsatynda dúbirli dodada qusbegilikten Qazaqstan qorjynyna medal salǵan ulttyq qurama múshelerine federatsııa prezıdenti Berik Ýálıden arnaıy syılyqtar qarastyrylǵan bolatyn.
TAS Group kompanııasy men onyń basshysy Dýlat Tastekeevtiń qoldaýymen sportshylar aqshalaı syılyqtarmen marapattaldy. Úshinshi oryn úshin Arman Qoshqarov, Baǵdat Keýenov jáne Baqdáýlet Babajanǵa 300 myń teńgeden, ekinshi oryn úshin Erzat Baıqadamovqa 500 myń teńge syıaqy berildi. Al «qarshyǵa salý» sanaty boıynsha birinshi oryn ıelengen Qudaıbergen Raýılulyna 1 mln teńge tabystaldy.
Q4 Tulpar Auto kompanııasynyń basshysy Talǵat Sakanovtyń qoldaýymen federatsııa «búrkit salý» sanatynda jeńimpaz atanǵan Serikbek Kúntýǵanǵa avtokólik kiltin syıǵa tartty. Sondaı-aq kompanııa basshysy «búrkit salýdan» ekinshi oryn alǵan jerlesi Erzat Baıqadamovqa da óziniń atynan temir tulpar tabystady.
Budan bólek, V Dúnıejúzilik kóshpendiler oıyndary dırektsııasynyń atynan jeke sport túrlerinde jeńimpazdarǵa – birinshi oryn úshin 500 myń teńge, ekinshi oryn ıelengender 300 myń teńge, qola júldeger 200 myń teńgege arnaıy sertıfıkattar tabystaldy.