Qusbegilik federatsııasynyń prezıdenti tóreshilermen kezdesti
Keleli jıynǵa qusbegilik sport túrinen ótetin jarysta qazylyq etetin 10 maman qatysty. Atap ótsek, aldaǵy saıystarda Qazaqstannan 6 tóreshi, Qyrǵyzstannan 2 jáne Mońǵolııa men Reseıden bir-bir tóreshiden qyzmet etedi. Bul dúbirli dodanyń halyqaralyq sıpaty men ádildik pen ashyqtyqqa degen umtylysty aıqyndaıdy.
«Elimizde ótip jatqan saıysqa kelgen sheteldik sportshylar kóp. Bul biz úshin úlken mártebe jáne jaýapkershilik. Barlyq qatysýshyǵa sáttilik tileımiz! Sonymen qatar tóreshilerden suraıtynymyz – saıystyń ádildigin jáne júıeliligin qatań saqtap, jarystyń joǵary deńgeıde ótýin qamtamasyz etý», - dedi «Qusbegilik» federatsııasynyń prezıdenti.
Sonymen birge mamandar jarys ótetin orynda bas qosyp, halyqaralyq normalar men standarttarǵa sáıkes daıyndyq jumystaryn júrgizdi. Osylaısha, qusbegilik saıysy boıynsha bekitilgen erejeniń qaǵıdalarymen qustyń ár túri boıynsha ótetin 2 jattyǵýdyń ortaq kórsetkishteri belgilendi. Bas tóreshi Marat Qoıshınnyń aıtýynsha, tórtkúl tarap kóz tikken baıraqty básekege sportshylar da, tóreshiler de, saıys ótetin alań da tolyqqandy daıyn.
«Barlyq qatysýshyny jarys alańymen tanystyrdyq. Búginde ulttyq qurama qusbegileri men sheteldik sportshylar qustaryn ushyryp, daıyndyq júrgizip jatyr. Qatysýshylardyń suranysy boıynsha saıys ótetin alańǵa tóreshilermen birge qajetti ózgerister engizildi. Jarys alańy halyqaralyq erejelerge saı keledi», – dep atap ótti Bas tóreshi.
Basqosý barysynda federatsııa prezıdentine sheteldik sportshylardyń daıyndyǵy men olardyń jattyǵýyna qajetti jaǵdaılar jasaý týrasynda esep berildi. «Uly dala dúbiri» uranymen ótip jatqan Kóshpendiler oıyndaryna qusbegilik sport túri boıynsha 10 memleketten 42 sportshy qatysady.
Atap ótsek, qazirgi tańda barlyq qatysýshy qyzý daıyndyq ústinde. Sondaı-aq otyrys barysynda saıysta qoldanylatyn jabdyqtardyń sapasy, jalpy sharanyń uıymdastyrylýy jáne sportshylar men kórermenderdiń qaýipsizdigin qamtamasyz etý sharalary jóninde sóz qozǵaldy.
Kezdesý qorytyndysy boıynsha «Qusbegilik» federatsııasynyń prezıdenti Berik Ýálı tóreshiler alqasyna Dúnıejúzilik etnosport konfederatsııasynyń atynan berilgen arnaıy sertıfıkattardy tabystady.