Qus tumaýy Qazaqstanǵa enbeı toqtatyldy - DDSU

ASTANA. QazAqparat - Qazaqstandaǵy Dúnıejúzilik densaýlyq saqtaý uıymy keńsesiniń basshysy Oleg Chestnov elimizdegi epıdemıologııalyq qadaǵalaý deıgeıine baǵa berdi, dep habarlaıdy QazAqparat tilshisi.

«Ekonomıkalyq turǵydan biz áli damyǵan elderdiń deıgeıine jetken joqpyz. Alaıda epıdemıologııalyq qadaǵalaý deıgeıi boıynsha biz óte qýatty júıeni qura bildik», - deıdi spıker Astanada ótken sýbóńirlik semınarda.

Onyń aıtýyna qaraǵanda, epıdemıologııalyq qadaǵalaý - ulttyq qaýipsizdik deńgeıindegi ótkir máselelerdiń biri.

«Sebebi, jaǵdaı epıdemııa nemese pandemııa satysynda bolýy múmkin. Shyntýaıtynda, qus tumaýy Qazaqstanǵa kirgizilmeı toqtatyldy. Sebebi, Qazaqstanda epıdemıologııalyq qadaǵalaý boıynsha eń úzdik mamandar jumys isteıdi. Ol mamandar Qazaqstannyń laborotorııasyn jaqsy qoldana bilýde», - deıdi DDSU ókili.

Onyń aıtýynsha, dárigerler men veterınarlar adamdar men janýarlardyń ómirine birdeı qaýipti juqpalarmen óz-ózdigimen kúrespeı, kúsh biriktirýi kerek.

«Qazaqstan aýyl sharýashylyǵyna den qoıǵan memleket bolǵandyqtan, mundaǵy veterınarııa dárigerlermen birge halyqty qorǵaı alatyndaı dárejede jumys istep jatyr», - deıdi Oleg Chestnov.

Aıta keterligi, Dúnıejúzilik janýarlardyń densaýlyǵy uıymy Dúnıejúzilik densaýlyq saqtaý uıymymen birge tuńǵysh ret Ortalyq Azııa men Eýropa elderi úshin adamdardyń da, janýarlardyń da ómirine qaýipti brýtsellez, ehınokokkoz jáne qutyrý aýrýlarynyń aldyn alý boıynsha sýbóńirlik keńes ótkizýde.