Qus sharýashylyǵyn damytýǵa BQO-da 1200-ge jýyq grant bólinedi

ORAL. QazAqparat – Batys Qazaqstan oblysynda qus sharýashylyǵyn damytý maqsatynda «Eńbek balapan» jobasy qolǵa alyndy, dep habarlaıdy QazAqparat tilshisi.

BQO Jumyspen qamtýdy úılestirý jáne áleýmettik baǵdarlamalar basqarmasynyń basshysy Altaı Qulqaevtyń aıtýynsha, atalmysh joba tabysy az, jumyssyz azamattardy kásipkerlikke tartýdy kózdeıdi.

Joba qoldanystaǵy «Eńbek» memlekettik baǵdarlamasy aıasynda qaıtarymsyz granttar berý tetigi negizinde júzege asyrylmaq.

Bıyl 625,1 mln teńge qarastyrylyp, 1179 grant bólý josparlandy.

A.Qulqaevtyń sózine qaraǵanda, joba 11 maýsymda Shyńǵyrlaý aýdanynan bastalatyn bolady. Oblys ortalyǵynan «Zelenyı Lýk» JShS Shyńǵyrlaý aýdanyna 2 myń bas birkúndik balapan aparady. Ony aýdan ortalyǵyndaǵy biryńǵaı operator «Ǵaını» sharýa qojalyǵy qabyldap alyp, 13 grant alýshyǵa úlestiredi.

Sondaı-aq 18 maýsymda Tasqala aýdanynda «Lých» ShQ biryńǵaı operator retinde 12 grant ıesin balapanmen qamtıdy. Al 30 maýsymda joba Báıterek jáne Qaratóbe aýdandarynda (Báıterek aýdany – operator «Evrogold» JK, 15 grant alýshy, 2400 balapan, Qaratóbe aýdany – operator «Baqytjan» ShQ, 12 grant alýshy, 2000 bas balapan) jalǵasady.

«Qazirgi tańda keste jasalyp, aýdandarǵa jáne Oral qalasyna balapandardy kezeń-kezeńmen jetkizý josparlanýda. Ázirge jobany oblystyń segiz aýdany men Oral qalasynda júzege asyrý kózdelgen», - dedi A.Qulqaev.