Qus fabrıkalaryna 150 myń tonna jem arzan baǵamen ótkiziledi

NUR-SULTAN. QazAqparat – QR Aýyl sharýashylyǵy birinshi vıtse-mınıstri Aıdarbek Saparov qus sharýashylyǵyn jemmen qamtamasyz etý sheshimderi týraly aıtty, dep habarlaıdy QazAqparat tilshisi.

«Bıyl respýblıkalyq bıýdjetten «Azyq-túlik kelisimshart korporatsııasy» AQ jarǵy kapıtalyn arttyrýǵa 20 mlrd teńge bólindi. Bul qarajat 200 myń tonna kólemdegi jemdi forvardty tártipte satyp alýǵa baǵyttalǵan. Onyń ishinde 150 myń tonna astyq qus fabrıkalaryna ótkiziledi. Bul qus jeminiń somasy naryqtaǵy qunynan 30 paıyzǵa arzan», - dedi A. Saparov elordadaǵy ІH halyqaralyq qus ósirýshiler forýmynda.

Bıyl Qazaqstanda qus ósirý salasynda oń kórsetkishter baıqalyp otyr.

Buǵan deıin habarlanǵandaı, qus jeminiń qymbattaýyna baılanysty qus ósirýshiler qıyndyqqa tap bolǵan.

«Qus jeminiń bir tonnasy 180-190 myń teńgege jetti. Qus eti men jumyrtqanyń ózindik qunynda 70 paıyzy jemniń baǵasyna qatysty bolady. Eger qus jemi arzan bolsa, onda bizdiń ónim de naryqqa tómen baǵamen shyǵady», - dedi Qazaqstan qus ósirýshileri odaǵynyń prezıdenti Rýslan Sháripov.

Qazaqstannyń qus ósirýshileri osy salaǵa memlekettik qoldaý jasaýdy surap otyr.