Qurylysta ımportty almastyrý aıasynda 33 jańa joba iske asyrylýda
«Otandyq qurylysty qoldaý kezinde qurylys ındýstrııasyna erekshe mán beriledi. Búgingi kúni qurylys ónimderi naryǵynda negizgi materıaldarǵa qajettilik 669 mlrd teńgeni quraıdy. 330 mlrd teńgege ónim óndirilip jatyr. 339 mlrd teńgege ónim ımporttalady. Importty almastyrý jumysy aıasynda 33 jańa joba iske asyrylyp jatyr. Osy kásiporyndar iske qosylǵannan keıin ımporttyń úlesi 54 paıyzǵa deıin tómendeıdi», - dedi Q. Óskenbaev «Nurly jer» baǵdarlamasyn iske asyrý barysyn talqylaý kezinde.
Onyń sózine qaraǵanda, shynyǵa suranysty jabý úshin Qyzylorda oblysynda quny 32 mlrd teńge bolatyn shyny zaýyty salynyp jatyr. Qosymsha Nur-Sultan qalasynda quny 13 mlrd teńge bolatyn polıetılendi qubyr óndirisi iske qosyldy («Kerim plastik pipes» JShS). Keramıka óndirisi («Zerde keramıka Aqtóbe» JShS) 26 mlrd teńge jáne armatýra óndirisi 40 mlrd teńgege («Tarazdyń armata zaýyty» JShS) ulǵaıady.
«Qosymsha iri qurylys kompanııalarymen jáne «Samuryq-Qazyna» ulttyq ál-aýqat qory» AQ-men birlesip «Qarapaıym zattar ekonomıkasy» baǵdarlamasy aıasynda 100 paıyz ımport almastyratyn otqa tózimdi kirpish, jabyn materıaldary, sanfaıans jáne lak-boıaý buıymdary óndirisi jobalaryn iske qosý máselesi pysyqtalyp jatyr. Búgingi kúni qurylys salasyna jáne aralas salalarǵa (qurylys ındýstrııasy, logıstıka, saýda, qyzmet kórsetý jáne t.b.) shamamen 642 myń qazaqstandyq tartylǵan. Turǵyn úı qurylysynyń qanatqaqty jobasy boıynsha qosymsha bólingen qarajat sheńberinde 15 myń jumys orny qurylyp jatyr. Qurylys ındýstrııasynda 29 myńnan astam azamat jumysqa ornalasty. Importty almastyratyn 33 kásiporynda shamamen 8 myń jumysshy eńbek etetin bolady», - dedi Qaıyrbek Óskenbaev.