Qurylys shyǵynynyń artýy baspana baǵasyn ósiredi - Talǵat Erǵalıev

NUR-SULTAN. QazAqparat – Qazaqstan qurylysshylar odaǵynyń basshysy Talǵat Erǵalıev aldaǵy ýaqytta baspana baǵasy nelikten qymbattaıtynyn túsindirdi, dep habarlaıdy QazAqparat tilshisi.

«Qazir aı saıyn qurylys materıaldary men qyzmetterdiń baǵasyn qolmen eseptep otyrmyz. Qurylys qunynyń 55%-56%-y qurylys materıaldary qalyptastyrady. Sondyqtan onyń baǵasy qurylys qunyna tikeleı áser etedi. Qazir azyq-túlik baǵasynyń ósip jatqanyn kórip otyrmyz. Azyq-túlik pen qyzmetter quny ósse, qurylysshylardyń da aılyǵy ósedi degen sóz», - dedi Talǵat Erǵalıev QazAqparat tilshisine bergen shaǵyn suhbatynda.

Onyń sózine qaraǵanda, qurylysshylardyń eńbekaqysy qurylys qunynyń 20 paıyzyn qalyptastyrady.

«Bul jerde biz tehnıkalyq jumysshylardyń, qurylys alańdarynda salaǵa qyzmet kórsetýshilerdiń aılyǵy týraly aıtyp otyrmyz. Damý menedjerleri, PR jáne HR-mamandar, prorabtar, smeta esepteýshiler, esepshiler men basqalar da kiredi»», - dedi sarapshy.

Osy eki faktordy alǵa tartqan Qurylysshylar odaǵynyń basshysy elde baspana baǵasy qymbattamasa, arzandamaıdy dep otyr.

«Bul, sáıkesinshe, sharshy metrdiń baǵasyn ósiredi. Jaǵymsyz bolsa da shyndyq osy. Bul qurylysshylar úshin de óte jaǵymsyz jańalyq. Óıtkeni salaǵa 2015 jylǵa deıin bolǵan ahýal sııaqty turaqtylyq kerek. Ol kezde qurylysshylar qolǵa alǵan jobasynyń tabystylyq deńgeıin boljaı alatyn. 2015 jyldan beri jaǵdaı túbegeıli ózgerdi. Bul bizdi qapalandyrady», - dedi Talǵat Erǵalıev.

Buǵan deıin Qurylysshylar qaýymdastyǵynyń basshysy Vıktor Mıkrıýkov aldaǵy eki aıda baspana qymbattamaıtynyn boljaǵan edi.