Qurylys salasyndaǵy baqylaýdy kúsheıtý kerek - senator
Onyń paıymynsha, ǵımarattar qurylysynyń sapasyna memlekettik baqylaýdyń azaıýy kásipkerliktiń damýyna oń áser etkenimen, salynǵan úılerdiń qulaýyna ákep soǵýy yqtımal.
«Keıingi 7-8 jylda bıznes-klımatty jaqsartyp, kásipkerlik qyzmetti retteý maqsatynda tekserý organdarynyń bul salaǵa aralasýy azaıdy. Baqylaý talaptarynyń álsireýiniń teris saldaryna toqtalsaq, Pavlodar qalasynda salynyp jatqan turǵyn úı qulap, sheteldik jumysshylar zardap shekti. Apatqa sapasyz jobalaý jáne negizgi talaptardy saqtamaı júrgizilgen qurylys jumystary, sondaı-aq tehnıkalyq qadaǵalaýdyń álsizdigi sebep boldy. Quzyrly organ nysanǵa ýaqtyly ınspektsııa júrgizgende, osyndaı kemshilikterge jol berilmes. Alaıda qoldanystaǵy zańnamanyń talaptary qurylys barysyn tekserýdi júzege asyrý qadamdaryn shektedi», - dedi senator Úkimet basshysynyń atyna joldaǵan saýalynda.
Depýtat qurylys ınspektorlarynyń jumys aýqymynyń kóptigi máselesine de nazar aýdardy. Qazirgi kezde olardyń sany 138 bolsa, salynyp jatqan nysandardyń sany 8 myńǵa jýyq.
Senator kez kelgen ǵımaratty nemese qurylysty odan ári paıdalaný kezinde adamdardyń qaýipsizdigin qamtamasyz etýdiń mańyzyn eskere otyryp, memlekettik sáýlet jáne qurylysty baqylaý salasy boıynsha qoldanystaǵy zańnamaǵa birqatar naqty ózgerister engizýdi usyndy.
Budan buryn habarlanǵandaı, 2021 jyldyń maýsym aıynda Pavlodarda qurylys júrip jatqan úı qulaǵan edi. Ǵımarat qulaǵan kezde úsh jumysshy zardap shekti, olardyń barlyǵy Ózbekstan azamattary.