Qurylys salasy Qazaqstan ekonomıkasynyń draıveri bolyp qala beredi

ASTANA. QazAqparat – Qurylys sektory el ekonomıkasynda, ásirese daǵdarys kezinde mańyzdy ról atqardy, dep habarlaıdy QazAqparat tilshisi.

Finprom.kz portalynyń málimetinshe, Qazaqstannyń jalpy ishki ónimi 2,5 paıyzǵa tómendegen 2020 jyly qurylys sektory birden 11,6 paıyzǵa ósti.

ıAǵnı el ekonomıkasynyń barlyq sektorlary arasynda rekordtyq kórsetkish. Bul naqty sektor úshin pandemııanyń jaǵymsyz saldaryn beıtaraptandyrýǵa múmkindik berdi.

Jalpy, qurylys Qazaqstan ekonomıkasynyń ósý draıverleriniń biri dep senimmen aıtýǵa bolady. Bıyl sala kólem ósimi boıynsha da kóshbasshylar qatarynda tur.

Máselen, eldegi ishki jalpy ónim alty aıdyń qorytyndysy boıynsha bir jylda 3,6 paıyzǵa ósse, qurylysta ósim 9,2 paıyzǵa jetti.

Bir qyzyǵy, sala taǵy bir joǵary tehnologııalyq segment — aqparat jáne kommýnıkatsııa salasymen (12,6 paıyz ósim) kósh bastap tur.

Búginde qurylys «taza» kúıinde eldiń jalpy ishki óniminiń 5 paıyzyn quraıdy. Bul rette sektor ekonomıkaǵa mýltıplıkatıvti áser etedi.

Ózimen baılanysty salalardy — óńdeý ónerkásibin, atap aıtqanda mashına jasaý jáne qurylys materıaldaryn óndirý, saýda, kólik-logıstıka jáne taǵy basqa salalardy yntalandyrady.

Sonymen qatar, qurylys elimizdiń áleýmettik-ekonomıkalyq damýyna zor úles qosýda. Sektorda 637,5 myń adam jumys isteıdi.

Qurylysta jumyspen qamtylǵandar sany respýblıkadaǵy barlyq jumyspen qamtylǵandardyń 7,2 paıyzyn jáne naqty sektorda jumys isteıtinderdiń 17,4 paıyzyn quraıdy.