Qurylys-montajdaý konkýrstarynda dempıng 5 paıyzǵa tómendetiledi
Bul týraly «Atameken» ulttyq kásipkerler palatasynyń basqarma tóraǵasynyń orynbasary Arman Mámbetaev «QazAqparat» halyqaralyq aqparat agenttiginiń alańynda ótken Orep Space kezdesýde aıtty.
«Qurylys-montajdaý jumystaryn satyp alý konkýrsynda dempıng máselesi bar. Qarjy mınıstrligi bul iste bizdi qoldap otyr. Saladaǵy dempıngti 5 paıyzǵa deıin túsirý josparlanýda. Qazir onyń kólemi – 10 paıyz. Qurylys kompanııalarynyń bári konkýrstyq irikteýden ári ótý úshin baǵany 10 paıyzǵa túsirýge májbúr degen sóz. Onyń saldary keıin shyǵyp jatady», - deıdi «Atameken» ókili.
Ulttyq kásipkerler palatasnyń ókili qurylys kompanııalarynyń jumys tájirıbesi boıynsha shartty jeńildik berý júıesinde de jemqorlyq táýekeli bar ekenin atady.
«Taǵy bir júıelik másele bar. Qurylys kompanııalarynyń kóbi osyny kóterip júr. Jergilikti ákimdikter janynan qurylǵan komıssııalar shartty jeńildik mólsherin belgilep otyr. Komıssııada adamdar otyrǵandyqtan, taǵy da adam faktory bar. Mysaly, bir kásiporynǵa bir óńirde shartty jeńildik retinde 2 paıyz berilse, basqa bir óńirde dál sol kompanııaǵa, dál sondaı jumys istegeni úshin 0,5 paıyz shartty jeńildik berilgen. Sýbektıvtik faktor bar dep otyrǵanymyz osy. Bul máseleniń sheshimi tsıfrlandyrýda dep otyrmyz. Kásiporynnyń jumys tájirıbesin adamdardan quralǵan komıssııa emes, avtomattandyrylǵan júıe baǵalaý kerek. Qazir osy másele boıynsha Qarjy mınıstrligimen birge jumys istep jatyrmyz. Jyl aıaǵynda deıin osy aýqymdy problemany sheshsek degen jospar bar. Óıtkeni osy másele boıynsha shaǵym aıtýshylar óte kóp», - dedi Arman Mámbetaev.