Qurylys materıaldarynyń negizsiz qymbattaýyna jol bermeý kerek – Asqar Mamın

NUR-SULTAN. QazAqparat – QR Premer-Mınıstri Asqar Mamın qurylys materıaldary baǵasynyń negizsiz ósýin boldyrmaý boıynsha shara qabyldaýdy tapsyrdy, dep habarlaıdy QazAqparat.

«Qurylystyń joǵary qarqyny – qurylys materıaldaryna qajettilikti arttyrady, olarǵa jumsalatyn shyǵynnyń úlesi tutas qurylystaǵy shyǵynnyń shamamen 50 paıyzyn quraıdy. Osyǵan oraı baǵanyń negizsiz ósýine jol bermeý jáne naryqta qatań baqylaýdy qamtamasyz etý boıynsha shuǵyl sharalar qabyldaý óte mańyzdy. Sondyqtan búgin usynylǵan sharalardy jalpy qoldaı otyryp, myna máselelerge toqtalǵym keledi», - dedi A. Mamın búgingi Úkimet otyrysynda.

Eń aldymen Premer-Mınıstr qurylys kompanııalary men otandyq qurylys materıaldaryn óndirýshiler tarapynan spekýlıatıvtik áreketterge jol bermeý qajettigin aıtty.

«Básekelestikti qorǵaý agenttigi Indýstrııa mınıstrligimen jáne ákimdiktermen birlesip, josyqsyz óndirýshiler men ónim berýshilerge qatysty qatań sharalar qabyldaýy qajet. Ekinshiden, ofteık-kelisimsharttar da baǵanyń turaqtylyǵyn qamtamasyz etýdiń tıimdi quraly bola alady.

Qazirgi ýaqytta Úkimet qurylys salýshylarmen keıinnen turǵyn úıdi belgilengen baǵamen satyp alýǵa offteık-kelisimsharttar tetigin engizip jatyr. Indýstrııa mınıstrligine Ulttyq kásipkerler palatasymen birlesip, qurylys salýshylar men qurylys materıaldaryn óndirýshiler arasynda uzaq merzimdi satyp alý kelisimsharttaryn jasaýdy pysyqtaýdy tapsyramyn», - dedi Úkimet basshysy.

Sonymen birge, A. Mamın otandyq qurylys materıaldaryn odan ári damytý naryqty qoljetimdi materıaldarmen tolyqtyrýdyń mańyzdy aspektisi ekenin eske saldy.

«Jańa óndirister qurý, eskilerin jańǵyrtý qurylys shyǵyndaryn aıtarlyqtaı azaıtýǵa múmkindik beredi. Indýstrııa mınıstrligine ákimdiktermen jáne «Atameken» kásipkerler palatasymen birlesip, qurylys salasynda ımport almastyrý boıynsha josparlanǵan jobalardy ýaqytynda iske qosýdy tapsyramyn. Roman Vasılevıch (QR Premer-Mınıstriniń orynbasary Roman Sklıar – red.) jalpy baqylaý sizge júkteledi», - dedi Asqar Mamın.

Eske sala ketsek, qańtar-sáýir aılarynda otandyq qurylys materıaldary 16%-ǵa qymbattaǵan.

QR Básekelestikti qorǵaý jáne damytý agenttiginiń tóraǵasy Serik Jumanǵarın qurylys materıaldarynyń alypsatarlyqtan qymbattaǵanyn aıtty.