Qurylys materıaldarynyń qymbattaýy turǵyn úı naryǵyna áser etýde – Serik Jumanǵarın

NUR-SULTAN. QazAqparat – Bıyl qańtardan sáýirge deıingi satý-satyp alý operatsııalarynyń sany ótken jyldyń sáıkes kezeńimen salystyrǵanda 2,5 esege ósti. Bul týraly QR Básekelestikti qorǵaý jáne damytý agenttigi «QazAqparat» HAA alańynda ótkizgen bastapqy turǵyn úı naryǵyndaǵy básekelestik týraly Open Space-te aıtyldy, dep habarlaıdy QazAqparat tilshisi.

«Turǵyn úı baǵasynyń jaǵdaıy turaqty emes jáne qubylmaly bolýymen erekshelenedi. 2021 jyldyń qańtar-sáýir aılarynda bastapqy turǵyn úı baǵalarynyń ósýi 5,5% qurady. Ótken jyldyń sáıkes kezeńimen salystyrǵanda ol 1,5%-dy ǵana qurady. Bıylǵy ekinshi deńgeıli turǵyn úıdiń baǵasy ósip keledi, ıaǵnı 12,3% ósti, 2020 jyldyń osy kezeńinde 2,2% bolǵan», - deıdi QR Básekelestikti qorǵaý jáne damytý agenttiginiń tóraǵasy Serik Jumanǵarın.

Onyń aıtýynsha, bıyl qańtardan sáýirge deıingi satý-satyp alý operatsııalarynyń sany ótken jyldyń sáıkes kezeńimen salystyrǵanda 2,5 esege ósip, 175 040-qa jetti.

«Memleket basshysy qabyldaǵan sońǵy sharalar men qurylys materıaldarynyń qymbattaýy turǵyn úı naryǵyna áserin tıgizýde», - deıdi ol.