Qurylys kompanııasynyń qaryzynan astanalyqtar páterlerin rásimdeı almaı júr
«Bizde 656 páter bolsa, onyń 97-sine tyıym (arest) salynǵan. Bizdiń páterler bul tizimge qalaı tap boldy? Memlekettik kirister komıteti «Romýl» qurylys kompanııasy men úlestes kompanııalarǵa qatysty qylmystyq is qozǵaǵan. Qazirgi ýaqytta arest máselesi sheshiler emes. Segiz aıdan beri páterlerimizden tyıymdy alyp tastaı almaı júrmiz. Biz ıpotekashylarmyz, qolma-qol aqshaǵa páter alǵandar da bar. Bul tyıymnan qashan arylamyz? Bizge erteń, eki kúnnen soń, kelesi aptada dep jaýap beredi», - dedi Baqyt Ahmetjanova ákim orynbasarynyń eseptik kezdesýinde.
Páterge salynǵan tyıym týraly ol bankte ıpotekanyń kezekti jarnasyn tóleý kezinde bilgen. Eýrazııalyq bank «Romýl» kompanııasyna úı qurylysy úshin nesıe bergen. Qazirgi ýaqytta kompanııa 14 mlrd teńgege jýyq qaryz. Bıyl bank osy qaryzdy qaıtarý úshin ótinish hat berdi. Memlekettik kirister komıteti turǵyndar satyp alǵan páterlerdi «Romýl» menshigi dep túsindiredi.
«Bul aqparat bir apta buryn bizge jetken. Bul sizderdiń nysandaryńyzǵa ǵana qatysty emes. «Romýl» turǵyzǵan barlyq nysandar tyǵyryqqa tirelip otyr. Bul másele páterin ala almaı júrgen úleskerlermen emes, turyp jatqan baspanasyn rásimdeı almaı júrgenderge qatysty. Suraqty túsindik. Qoǵamdyq birlestikterdi osy máseleni talqylaýdy usynamyn. Kelesi aptada sheshim shyǵarý úshin máseleni Memlekettik kirister deparatmentiniń qatysýymen mekemearalyq komıssııada qaraımyz. Árıne, páterdi sizderden alyp qoıýǵa tosqaýyl bolatyn sharalar qabyldanady. Munda qazir ákimdiktiń qurylymdyq bólimsheleri emes, qylmystyq isti tergep jatqan kúshtik organdar jumysqa tartylǵan. Barlyq mán-jaıdy anyqtap, kómektesýge tyrysamyz», - dep jaýap berdi Sergeı Horoshýn.