Qurylys kompanııasynyń basshysy: úıi bardyń kúıi bar

AQTAÝ. QazAqparat - Stýdentter, jas mamandar, olardyń otbasylary úshin qoljetimdi baspananyń bolýy - jeke ál-aýqattyń, mansabynda jetistikke umtylýdyń kepili, dep esepteıdi «Korporatsııa Kaspıı stroı-servıs» JShS qurylys kompanııasynyń basshysy, oblystyq máslıhattyń depýtaty Samat Musabaev, dep habarlaıdy «QazAqparat» HAA tilshisi.

«Memleket basshysy Nursultan Nazarbaevtyń Qazaqstanda stýdentter úshin jataqhana qurylysy boıynsha bastamasyn tolyqtaı qoldaımyn. Jastar turǵyn úı máselesine bas qatyrmaı, sapaly bilim alýlary kerek», - dedi Samat Musabaev.

Sondaı-aq, ol búginde elimizde álemdik talaptarǵa saı bilim berý júıesin qura otyryp, bilim berý jaǵdaıyna, stýdentterdiń turǵylyqty jerlerine nazar aýdarý kerektigin atap ótti.

«Elbasy 2022 jyldyń sońyna deıin 75 myń orynnan kem bolmaıtyn stýdentter jataqhanasyn salýdy tapsyrdy. Men Otanymyzdyń patrıoty, qurylys kompanııasynyń ıegeri jáne basshysy retinde osy tapsyrmany tolyqtaı qoldap, atalmysh baǵdarlamany júzege asyrýǵa daıynmyn. Alaıda, bul baǵdarlama tek stýdentterge ǵana emes, sondaı-aq jas mamandarǵa qatysty bolýy kerek. Qazirgi tańda Mańǵystaý oblysynda 407 memqyzmetshi men 400 dárigerdiń bos jumys orny bar», - dep atap ótti qurylys kompanııasynyń basshysy.