Quryq jáne Aqtaý porttary Iran men Ázerbaıjannan avtoparomdardy ýaqytsha qabyldamaıdy

NUR-SULTAN. QazAqparat – Indýstrııa jáne ınfraqurylymdyq damý vıtse-mınıstri Berik Qamalıev Quryq jáne Aqtaý porttaryndaǵy shekteý sharalarynyń mán-jaıyn túsindirdi, dep habarlaıdy QazAqparat tilshisi.

«Úkimettik vedomstvoaralyq komıssııanyń sheshimimen 5 naýryzdan bastap Iran jáne Ázerbaıjannan jeńil avtokólikterdiń tasymalyn júzege asyratyn júrgizýshilerge Aqtaý jáne Quryq porttarynyń paromdarynda kórsetiletin qyzmetti toqtattyq», - dedi Berik Qamalıev OKQ-da ótken baspasóz máslıhatynda.

Vıtse-mınıstrdiń aıtýyna qaraǵanda, bul shekteý sharalarynyń júk tasymalyna qatysy joq.

«Aqtaý jáne Quryq porttarynan Kaspıı teńizi arqyly júk tasymalyn júrgizetin teńiz kemeleriniń ekıpajdarynyń shyǵýyna shekteý qoıdyq. Sonymen qatar halyqaralyq tasymaldy júzege asyratyn qazaqstandyq kemelerdiń ekıpaj músheleriniń aýysymy kezindegi sanıtarlyq qyzmettiń baqylaýyn qataıttyq. Teńiz ákimshiliginiń buıryqtarynyń bári Kaspıı teńizimen shektesip jatqan elderdiń barlyq teńiz ákimshiligine joldandy», - dedi ol.

Eske sala ketsek buǵan deıin Berik Qamalıev 8 naýryzdan bastap 1-shi sanattaǵy elderdiń azamattary Qazaqstanǵa kire almaıtynyn málim etken edi.