Quryq portynyń ekinshi kezeńi bıyl aıaqtalady - vıtse-premer

ASTANA. QazAqparat - Quryq portynyń ekinshi kezeńi bıyl aıaqtalady. Bul jaıynda búgin Astana ekonomıkalyq forýmy aıasynda ótken IV Halyqaralyq kóliktik-logıstıkalyq «New Silk Way» bıznes forýmynda QR Premer-Mınıstriniń birinshi orynbasary Asqar Mamın málim etti, dep habarlaıdy QazAqparat.

«Qazirgi ýaqytta avtomobıl joldaryn, teńiz porttaryn, áýejaı ınfraqurylymdaryn aýqymdy jańǵyrtý júrgizilýde. Máselen, «Batys Eýropa-Batys Qytaı» halyqaralyq kólik dálizi Eýropaǵa deıingi eń qysqa avtojol baǵdaryna aınaldy. Munan bólek, «Aqtaý» teńiz portyn keńeıtý aıasynda Soltústik teńiz termınaly jobasy júzege asyryldy. Quryq portynyń birinshi kezeńi salyndy jáne 2017 jyldyń sońyna deıin bul jobanyń ekinshi kezeńin aıaqtaıtyn bolamyz», - dedi Asqar Mamın.

Onyń aıtýynsha, Qazaqstan kólik dálizderiniń tıimdiligin arttyrý maqsatynda kóliktik konsortsıýmdar aıasyndaǵy seriktesterine basa nazar aýdaryp otyr. Olardyń qatarynda Qytaı, Ázerbaıjan, Grýzııa, Túrkııa, Ýkraına, Rýmynııa jáne Polshanyń kóliktik-logıstıkalyq kompanııalary men temirjoldary bar.

«Túrikmenstan men Irandaǵy áritesterimizben birge Parsy shyǵanaǵy baǵytyndaǵy dálizdi basqarý jónindegi komıtet qurýdamyz. Álemdik logıstıkalyq naryqtaǵy iri oıynshylarmen strategııalyq alıans ta qurylyp jatyr. Osylaısha, Qazaqstanda konteınerlik servıstiń tıimdiligin arttyrýǵa múmkindik beretin barlyq qajetti sharttar men ınfraqurylymdar qurylý ústinde», - dedi birinshi vıtse-premer.