Quryq portynyń bas dırektory taǵaıyndaldy

ASTANA. QazAqparat - «Qazaqstan temir joly» UK» AQ basqarmasynyń sheshimimen «Quryq porty» JShS bas dırektory qyzmetine Myrzabek Saqtaǵanov taǵaıyndaldy, dep habarlaıdy QazAqparat.

Osyǵan deıin ol Quryq portyndaǵy parom kesheni dırektorynyń orynbasary laýazymynda boldy.

Parom kesheniniń ekinshi kezeńi 2017 jyldyń jeltoqsanynda paıdalanýǵa beriledi. Júk jáne jolaýshy kemeleri túıisetin taǵy 2 kópir salynady dep kútilýde.

Keshen arqyly astyq, munaı ónimderi jáne basqa da halyq jáne óndiriste tutynatyn túrli taýarlar tasymaldanyp, elimizdiń kóliktik-logıstıkalyq júıesi  keńeıedi. Jylyna 5,1 mıllıon tonna júk tasymaldaıtyn qýatty keshenniń arqasynda sheteldermen aradaǵy taýar aınalymy artady.

Quryq portyndaǵy bul keshenniń qurylysy 2015 jyldyń sáýirinde bastalǵan edi. 2015 jyldyń maýsymynda «Bordaqty-Ersaı» temir jol jelisi boıynsha qurylys materıaldaryn jetkizý úshin qozǵalys ashyldy.