Kýrý ǵarysh aılaǵynda KazEOSat-1 qazaqstandyq jer seriginiń ushyrylýy aýa raıyna baılanysty keıinge shegerildi
Bul týraly Gvıana ǵarysh ortalyǵynyń ushýdy basqarý ortalyǵyna jınalǵan qonaqtar men qatysýshylarǵa Arianspace prezıdenti Stefan Izrael habarlady. Ol keıinge shegerýdiń sebebin qatty jelmen baılanystyrdy.
S.Izrael iske qosylý ýaqytynyń keıinge aýystyrylýyna baılanysty keshirim surap, Arianspace óz seriktesteri men tapsyrys berýshileriniń senimi men bedelin mańyzdy sanaıtyndyǵyn atap ótti. «Soǵan baılanysty biz ushyrý ýaqytyn keıinge aýystyrý týraly sheshim qabyldadyq», - dedi ol.
«Vega» zymyran-tasyǵyshy men qazaqstandyq KazEOSat-1 jer seriginiń ushyrylýy bir táýlik keıinge aýystyryldy.
Kýrý ǵarysh aılaǵyna kelgen Qazǵarysh tóraǵasy Talǵat Musabaev bul jaǵdaıǵa baılanysty túsinikteme berdi. «Biz aýa raıynyń qolaısyzdyǵyna baılanysty oryn alǵan jaǵdaıǵa túsinistikpen qaraımyz jáne jer serigin iske qosýǵa jaýapty Arianspase sheshimine tolyqtaı senemiz», - dedi ol.