Qurty-Burylbaıtal avtojolynyń qaıta jańartýdan ótken ýchaskesinde qozǵalys ashyldy

<p>ASTANA. KAZINFORM - 15 tamyzda &laquo;QazAvtoJol&raquo; ulttyq kompanııasy respýblıkalyq mańyzy bar &laquo;Qurty-Burylbaıtal&raquo; avtojolynyń 2214-2295 shaqyrymy aralyǵyndaǵy qaıta jańartýdan ótken ýchaskesinde (Almaty oblysy boıynsha) jol qozǵalysyn resmı túrde ashty. Uzyndyǵy 81 shaqyrymdy quraıtyn ýchaske &laquo;Ortalyq-Ońtústik&raquo; kólik dáliziniń mańyzdy bóliginiń biri.</p>

«Ortalyq-Ońtústik» kólik dálizi Almaty, Jambyl jáne Qaraǵandy oblystaryn baılanystyrady. Onyń halyqaralyq, oblysaralyq, jergilikti kólik jáne júk tasymalyn qamtamasyz etýde mańyzy zor.

«Qaıta jańartý jobasy barysynda osy dálizge qarasty Almaty oblysy boıynsha 166 shaqyrym joldy jańartý josparlanǵan. Uzyndyǵy 81 shaqyrym bolatyn „Qurty-Burylbaıtal“ ýchaskesiniń qaıta jańartý jumystary aıaqtaldy. Ol Jambyl jáne Almaty oblysynyń shekarasynan bastalyp Qansheńgel aýylyna deıin sozylyp jatyr.

Qaıta jańartýdan ótken avtojol І-b tehnıkalyq sanatyna aýystyrylyp, eki baǵytta tórt jolaqty qozǵalyspen qamtamasyz etildi. Jobany júzege asyrý barysynda 3 mln m³ astam jer jabyny ornalastyrylyp, 1,5 mln m² asa úsh qabatty asfaltbeton tóseldi. Sondaı-aq 8 kópir men 66 sýótkizgish qubyr ornatyldy. Avtojoldyń jańa ýchaskesi qaýipsiz jol qozǵalasynyń zamanaýı talaptaryna saı jáne jol qozǵalysyn uıymdastyrý úshin barlyq qajetti qurylǵylar ornatylǵan», — dep jazdy QazAvtoJol mekemesinen.

Joldyń kólik paıdalaný deńgeıiniń joǵary bolýyna baılanysty qaıta jańartýdan ótken tórt jolaqty avtojolda júrý ýaqyty aıtarlyqtaı qysqardy. Bul óz kezeginde Qytaı, Reseı men Ortalyq Azııa elder arasyndaǵy tranzıttik tasymaldyń ósýine áser etip, Balqash kóline qaraı týrısterdiń sanynyń artýyna septigin tıgizbek.