Kýrsanttar granata ustaǵan kúdiktilerdi qolǵa túsirdi

NUR-SULTAN. QazAqparat - Tótenshe jaǵdaı rejımin jáne karantındik sharalardy qamtamasyz etý jónindegi mindetterdi oryndaý kezinde áskerı qyzmetshiler batyldyq pen ójettik, tapqyrlyq pen qarapaıym adamgershilik qajet bolatyn ərtúrli oqys jaǵdaılarǵa tap bolady, dep habarlaıdy QR QM baspasóz qyzmeti.

Mundaı jaǵdaıǵa jaqynda Almaty qalasynda patrýldeýge qatysatyn Radıoelektronıka jáne baılanys əskerı-ınjenerlik ınstıtýtynyń kýrsanttary tap boldy. Olar Tóle bı-Saın kóshesinen granatasy bar er adamdy ustady.

Kýrsanttardyń aıtýynsha, olarǵa bir jigit kelip eki adamdy kórgenin, olardyń biriniń qolynda jarylǵysh granataǵa uqsas zat bolǵanyn aıtqan. Áskerı qyzmetshiler atalǵan adamdardy quryqtaýǵa tyrysqanymen, olar qasha jónelgen. Olardy kýrsanttar qýyp júrip qolǵa túsirgen.

«Olardyń biriniń qaltasynda bir zat boldy. Kenetten ol əlgi zatty alyp, jerge laqtyrdy. Men granatanyń korpýsyn baıqadym», – deıdi kýrsanttardyń biri Ersultan Bolat.

Ustalǵan adamdar polıtsııaǵa tapsyrylyp, granata alynyp, saraptamaǵa jiberildi. Keıin anyqtalǵandaı, olardyń bireýi buryn urlyq jáne tonaý əreketteri úshin sotty bolǵan. Jarylǵysh zat qaıdan alynyp, sondaı-aq ne maqsatta paıdalanbaq bolǵanyn quqyq qorǵaý organdary anyqtaıdy.

Sondaı-aq, Qurlyq áskerleri əskerı ınstıtýtynyń 4-kýrs kýrsanty Meırambek Naısekenov Almaty qalasy men oblys shekarasyndaǵy kópirden ózenge sekirip, ózine qol jumsamaq bolǵan áıeldi qutqardy. Qarańǵyda kópirdiń artynda turǵan áıeldiń beınesin kórgen Meırambek oǵan kómekke júgirgen. Ol birden qolynan ustap alyp, ony kópirdiń súıenishinen alyp, qaýipsiz jerge alyp barǵan.

Bolǵan oqıǵa týraly áskerı qyzmetshi ratsııa boıynsha blokpost basshylyǵyna baıandap, polıtsııa kelgenge deıin áıelge psıhologııalyq qoldaý kórsetýge tyrysqan. Belgili bolǵandaı, ol óziniń jigitimen aıyrylysýyna baılanysty osyndaı qadamǵa barǵan. Quqyq qorǵaý organdarynyń ókilderi kýrsanttyń batyl áreketteriniń arqasynda áıel tiri qalǵanyn atap ótti. Meırambekke osy əreketi úshin alǵys jarııalandy.

Aqtóbede Áýe qorǵanysy kúshteri əskerı ınstıtýtynyń kýrsanttary Roman Óteseıitov pen Dıas Shamenov te óz batyldyqtaryn kórsete bildi. Áskerı polıtsııa jasaǵynyń áskerı qyzmetshilerimen birge patrýldeýge qatysa otyryp, ákimshilik quqyq buzýshylyq jasaǵan er adamdy ustady. Atalmysh oqıǵa Beıbitshilik dańǵylynda oryn aldy. Ustalǵan azamatta sýyq qarý bolǵany anyqtaldy.

Aıta ketý kerek, əskerı oqý oryndarynyń joǵary kýrs kýrsanttary patrýldeýge qatysady. Bolashaq ofıtserler tájirıbeli áskerı áriptestermen jáne quqyq qorǵaý organdarynyń qyzmetkerlerimen birlese qoıylǵan mindetterdi oryndaıdy jáne osyndaı qıyn jaǵdaılarda da azamattyqtaryn tanytady.