Qurmet Talapqazyǵa Shymkenttegi ýnıversıtette tegin oqý múmkindigi berildi

NUR-SULTAN. QazAqparat – Ala jazdaı jutqa tap bolǵan Mańǵystaý óńirine elden kómek jınap, qolmen shóp shaýyp tasyǵan Qurmet Talapqazyǵa Shymkent qalasyndaǵy M. Áýezov atyndaǵy Ońtústik Qazaqstan ýnıversıtetinde tegin bilim alý múmkindigi berildi, dep habarlaıdy QazAqparat tilshisi.

Bul týraly bilim ordasynyń Facebook-tegi paraqshasynda habarlandy.

«Bilim jáne ǵylym mınıstriniń joǵary oqý oryndary rektorlarymen ótkizgen jınalysynda Shymkent qalasyndaǵy M. Áýezov atyndaǵy Ońtústik Qazaqstan ýnıversıtetiniń basshylyǵyna qala turǵyny Qurmet Talapqazyǵa tegin oqý quqyǵyn berý múmkindigin qarastyrý tapsyryldy.

Búgin Qurmet Talapqazy M.Áýezov atyndaǵy Ońtústik Qazaqstan ýnıversıtetinde tegin oqı alady degen sheshim qabyldandy. Ashat Aımaǵambetov Qurmet Talapqazymen telefon arqyly sóılesip, oqýda jaqsy jetistikterge jetýin tiledi», - delingen jazbada.

Eske salsaq, Shymkent qalasynyń 25 jastaǵy turǵyny Qurmet Talapqazy elimizdiń batysyndaǵy qýańshylyqqa tap bolǵan maldy aýyldarǵa jem-shóp jiberý úshin búkil jumysyn tastap, qoǵamdyq bastamaǵa muryndyq bolǵan edi.

Keıin onyń bastamasyna Aýyl sharýashylyǵy mınıstrligi qulaq asyp, «Qazaqstan temir joly» ulttyq kompanııasyn kómekke tartqan bolatyn.