Qurmanǵazynyń kúıleri jaıly mýltserıal jaryqqa shyqty
Mýltserıal ataqty kúıshi Qurmanǵazy Saǵyrbaıulyna arnalǵan. Joba avtorlary – otandyq jas sýretshiler. Olardyń aıtýynsha, anımatsııa arqyly jastarǵa, balalarǵa tól tarıhymyzdy nasıhattaý jeńil bolady.
«Dala shyrqaýy» mýltserıalynyń alǵashqy maýsymy 13 bólimnen turady. Ázirge birinshi bólimi ǵana shyqty. Ekinshi serııasy kelesi aptada kórermenge jol tartady dep josparlanǵan.
«Stsenarııdi ózimiz jazyp jatyrmyz. Basynda bizde adam kóp bolǵan joq. 14 adammen bastap edik. Birinshi serııany jasaý 6 aıǵa deıin sozylyp ketti. Qazir adam kóbeıdi 1 serııaǵa 2,5 – 3 aı ketedi. Qyzyǵyp, izdenip jatqan kezde qazaqta kúıdiń 3-4 mektebi bar ekenine kózim jetti. Endi árbirin ashý kerek. Kelesi sezondar soǵan arnalady. Kúıshilerdiń biri biz tańdaǵan Súgir bolady», - deıdi jobanyń art-dırektory Sanjar Júsip.