Qurlyqtyq kýbok oıyndarynda «Nomad» alǵashqy jeńisine qol jetkizdi
Jarystyń fınaldyq satysynda elordalyq komanda «Kardıff Devılz» (Ýels), «Katovıtse» (Polsha) men «Hernıng Blıý Foks» (Danıı) klýbtarymen oınaıdy.
Elordalyq komanda birinshi oıynda «Kardıff Devılz» klýbymen sheberlik baıqasty. Kezdesý barysynda «Nomad» sapynan Stanıslav Aleksandrov birinshi, Abaı Mańǵysbaev ekinshi mınýtta mergendik tanytty. Odan keıin qarsylas komanda bir golmen jaýap qaıyrdy. Al 21-mınýtta Nıkolaı Shýlyga taǵy da «Nomadtyń» basymdyǵyn arttyrsa, odan keıin «Kardıff Devılz» oıynshylary taǵy bir márte gol soqty.
Oıynnyń 45 mınýtynda elordalyq komandadan Abaı Mańǵysbaev ekinshi márte qaqpany dál kózdese, 58 mınýtta Mıhaıl Rahmanov kezdesý núktesin qoıdy. Osylaısha «Nomad» qarsylasynan 5:2 esebimen basym tústi.
Endi aldaǵy oıynyn búgin, 13 qańtarda «Hernıng Blıý Foks» komandasyna qarsy ótkizedi.
Aıta ketsek, «Nomad» óz tarıhynda ekinshi márte jarystyń atalǵan satysynda baq synaýǵa múmkindik alyp otyr. Budan buryn qazaqstandyq komanda Latvııanyń «Zemgalesin» 4:1, Ýelstiń «Kardıff Devılzin» 5:4, Frantsııanyń «Grenoblin» 2:0 esebimen jeńip, E tobynda birinshi oryn aldy.
Qurlyqtyq kýbok Halyqaralyq shaıbaly hokkeı federatsııasy aıasynda 1997 jyldan beri turaqty túrde ótkizilip keledi. Qazirge deıin elimizdiń atynan qatysqan Kókshetaýdyń «Arlan» komandasy 2018/2019 jylǵy týrnırde bas júldeni jeńip aldy.
Ár jyldarda «Beıbarys» (Atyraý), «Saryarqa» (Qaraǵandy), «Nomad» (Astana) ekinshi orynǵa jaıǵassa, «Qaztsınk-Torpedo» (Óskemen) qola júldeger atanǵan edi.