Qurylys salasynda otandyq ónimderdiń úlesi qandaı

<p>ASTANA. KAZINFORM &ndash; Qazaqstannyń jalpy ishki ónimindegi qurylys salasynyń úlesi 0,8 paıyzdy qurady. Bul týraly QR Ónerkásip jáne qurylys mınıstrliginen málim etti.</p>

«Eldiń JІÓ qurylymyndaǵy salanyń úlesi 0,8% quraıdy (2023 jylǵy 9 aı). 2023 jyly qurylys materıaldaryn óndirý kólemi 1 249,5 mlrd teńgeni qurady. Bul kórsetkish 2022 jylmen salystyrǵanda 10,3 paıyzǵa artyq. Qurylys materıaldary naryǵynyń kólemi 2023 jylǵy qańtar-jeltoqsanda 3 671,7 mln AQSh dollaryna (1 675,4 mlrd teńge) jetti», - delingen Ónerkásip jáne qurylys mınıstrliginiń Kazinform agenttigine bergen jaýabynda. 

Osy salada otandyq taýar óndirýshilerdiń úlesine 68 paıyzy tıesili. Importtyq ónimniń úlesi 32% qurady. Otandyq óndiris ishki naryqty portlandtsement, taýarlyq beton, gıps, eritindiler, gıpsokarton sııaqty ónimdermen tolyq qamtamasyz etip otyr. 

«QR Strategııalyq josparlaý jáne reformalar agenttigi Ulttyq statıstıka bıýrosynyń derekterine sáıkes, 2023 jyldyń qorytyndysy boıynsha Qytaıdan qurylys materıaldarynyń ımporty 297,8 mln AQSh dollaryn qurady. Byltyrǵy ımporttyń negizgi taýarlaryna mynadaı ónimder kirdi: eden jabyndary, sanfaıans, mármár, travertın, keramıkalyq qurylys materıaldary jáne basqa da taýarlar bar», - dep atalyp ótken mınıstrlik aqparatynda.