Qurylatyn Eýrazııalyq qaıta saqtandyrý kompanııasy EAEO elderine ne beredi

<p>Búgin Senattyń jalpy otyrysynda &laquo;Eýrazııalyq qaıta saqtandyrý kompanııasyn qurý týraly kelisimdi ratıfıkatsııalaý týraly&raquo; Zań maquldandy, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

Atalǵan qujat 2022 jylǵy 20 qazanda Erevan qalasynda bekitilip, Eýrazııalyq qaıta saqtandyrý kompanııasyn qurý týraly Kelisimdi ratıfıkatsııalaýǵa baǵyttalǵan. Osy Kelisim múshe memleketterdiń eksportty qoldaýdyń birlesken sharalaryn, onyń ishinde saqtandyrý jolymen qoldanýdy kózdeıtin Eýrazııalyq ekonomıkalyq odaq týraly sharttyń 41-tarmaǵyn iske asyrýǵa múmkindik beredi.

«Kelisim qurylatyn Eýrazııalyq qaıta saqtandyrý kompanııasynyń maqsattaryn, mártebesin jáne mindetterin aıqyndaıdy. Kompanııanyń fýnktsııalaryn jáne Jarǵylyq kapıtalǵa qatysý úlesterin tóleý tártibin bekitetin kompanııanyń Jarǵysy kelisimniń ajyramas bóligi sanalady. Atalǵan kompanııa tıisti máselelerdi sheshýge kómektesý úshin qurylǵan, ıaǵnı ózara saýda jáne ınvestıtsııalar kólemin ulǵaıtýǵa, kompanııaǵa qatysýshy memleketter arasyndaǵy ekonomıkalyq ıntegratsııany damytýǵa yqpal etedi. Sonymen qatar, ınvestıtsııalyq tartymdylyqty arttyrýǵa jáne múshe memleketterdiń úshinshi eldermen saýda-ekonomıkalyq baılanystaryn keńeıtýge baǵyttalǵan», – dedi senator Serik Shaıdarov.

Bul kompanııa óz maqsattaryna qol jetkizý úshin mynadaı fýnktsııalardy oryndaıdy:

- qaıta saqtandyrýdy jáne eksporttyq kredıtterdi qamtamasyz etýdi júzege asyrýdy;
- múshe memleketter men úshinshi elderdiń eksporttyq kredıttik agenttikterimen, saqtandyrýshylarymen jáne qaıta saqtandyrýshylarymen ózara is-qımyldy júzege asyrýdy;
- qatysýshy memleketterde táýekelderdi qaıta saqtandyrý kezinde táýekelderge baǵalaý júrgizýge, táýekelderdi barynsha azaıtýǵa jáne shyǵyndardy retteýge járdemdesýdi;
- qaıta saqtandyrý salasynda marketıngtik zertteýlerdi, konsýltatsııalyq, zertteýshilik jáne aǵartýshylyq qyzmetti júrgizedi.

«Kelisimdi qabyldaý Eýrazııalyq ekonomıkalyq odaqqa múshe memleketterdiń qarjy uıymdaryna ózara halyqaralyq saýda jáne ınvestıtsııalyq qyzmetti qoldaýǵa, sondaı-aq birlesken bıznes-jobalardyń úshinshi elderdiń naryqtaryna shyǵýyna belsendi qatysýǵa múmkindik beredi. Eýrazııalyq qaıta saqtandyrý kompanııasy eksporttyq-ımporttyq operatsııalardy qoldaıtyn uıymdardyń táýekelderin olardy qaıta saqtandyrý qorǵanysymen qamtamasyz etý jolymen tómendetedi. Óz kezeginde, Qazaqstan ekonomıkasy Eýrazııalyq ekonomıkalyq odaq elderimen saýda aınalymyn edáýir ulǵaıtý, sondaı-aq olardyń birlesip óndirilgen ónimderin úshinshi elderge ótkizý úshin serpin alady. Zań boıynsha Senattyń turaqty komıtetterinen eskertýler men usynystar kelip túsken joq», – dedi depýtat.