Quryq portynyń janynda keme qurastyratyn zaýyt salynady – Kólik mınıstrligi

<p>ASTANA. KAZINFORM &ndash; Syrtqy termınaldardyń qýattylyǵy 5 esege ósedi. Bul týraly Parlament Májilisinde kólik-logıstıkalyq áleýetti damytý taqyrybyna arnalǵan Úkimet saǵatynda Kólik mınıstri Marat Qarabaev málim etti.</p>

- Kólik dálizderdiń damýyna Aqtaý jáne Quryq teńiz porttarynyń ınfraqurylymy mańyzdy ról atqarady. Bul rette, basymdylyq konteınerlik tasymaldaýǵa berilip otyr. Aldaǵy 3 jyldyń ishinde Aqtaý portynyń konteıner óńdeý qabiletin 140 myńnan 550 myń konteınerge deıin ulǵaıtý josparlanǵan. Ol úshin qytaılyq «Lıanıýngan port» kompanııasymen birge konteınerlik habtyń qurylysy bastaldy. Oǵan qosa, germanııalyq «Renýs», amerıkalyq Wandernet jáne frantsııalyq CMA CGM sııaqty kompanııalarmen qosymsha 300 myń konteınerlik termınal uıymdastyrý pysyqtalyp jatyr, - dedi M. Qarabaev.

Mınıstr Quryq portynda kópfýnktsıonaldy «Sarja» termınalynyń qurylysy júrip jatqanyn eske saldy.

- Onyń ishinde erekshe toqtalatyn másele, Mańǵystaý oblysynda óndirilý josparlanǵan «jasyl sýtegini» tasymaldaýǵa arnalǵan tıisti termınaldyń jobalanyp jatqanyn atap ótken jón, - dedi vedomstvo basshysy.

Onyń sózine qaraǵanda, kelesi negizgi máselelerdiń biri – otandyq flottyń jetispeýshiligi. Búginde «Quryq – Alıat» qarym-qatynasynda tek ázerbaıjandyq paromdar jumys istep tur. Sondyqtan qazirdiń ózinde elimizge eń keminde 7 keme qajet. Onyń óndirisin qalyptastyrý úshin túrkııalyq YDA jáne ASFAT kompanııalary Quryq portynyń janynda arnaıy zaýyt qurylysyn josparlap otyr.

- Qazaqstandyq dálizderge júk aǵyndaryn tartý úshin ishki termınaldarmen qatar, shet elderdiń júk jınaqtalatyn aýmaqtarynda syrtqy termınaldar da qalyptastyrylyp jatyr. Qazir Lıanıýngan portynda jáne Sıan qalasynyń qurǵaq portynda Qazaqstan-Qytaı termınaldary bar, sondaı-aq Grýzııanyń Potı portynda qazaqstandyq kásipkerdiń termınaly jumys istep tur. Óńdeý qabileti jylyna 500 myń konteıner. Qosymsha Alıat portynda, Máskeý mańyndaǵy Selıatıno qalashyǵynda, Belarýssııadaǵy Svısloch stantsııasynda jáne Tashkenttegi termınaldardyń qurylysy pysyqtalyp jatyr. Qurylys jumystary kelesi jyly bastalady. Jalpy qýattylyǵy jylyna 1 mln 200 myń konteınerdi quraıdy. Odan bólek aldaǵy ýaqytta Rýmynııanyń Konstantsa, Majarstannyń Býdapesht jáne Qytaıdyń Úrimshi qalalarynda birlesken termınaldardy uıymdastyrý qarastyrylyp otyr. Nátıjesinde, syrtqy termınaldardyń qýattylyǵy 5 esege ósedi. Bul basty júk qalyptastyrýshy elderden júkterdi qazaqstandyq dálizderge tartýǵa múmkindik beredi, - dep túsindirdi Marat Qarabaev.

Eske salsaq, bıyl kúzde Úkimet basshysy Oljas Bektenov Aqtaý, Quryq teńiz porttarynyń damý josparymen tanysty.

Sonymen qatar, Quryq portynda qýaty 1 mıllıon tonnalyq astyq termınalynyń qurylysy aıaqtaldy.