Qurǵaqshylyq saldarynan jınalatyn ónim kólemi azaıyp qalaıyn dep tur – Álıhan Smaıylov

ASTANA. QazAqparat – Qurǵaqshylyqtan birqatar óńirler zardap shekti. Olarda jınalatyn ónim kólemi azaıyp qalaıyn dep tur. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Ózderińiz biletindeı, jaz aılary jyldaǵydan ystyq boldy. Qurǵaqshylyqtan birqatar óńirler zardap shekti. Olarda jınalatyn ónim kólemi azaıyp qalaıyn dep tur. Qurǵaqshylyqtyń saldaryn joıý maqsatynda shuǵyl sharalar qabyldandy. Onyń ishinde Úkimet rezervinen qarajat bólinetin bolady. «Báıterek» holdıngi qurǵaqshylyqtan zardap shekken sharýalardyń kredıtteri boıynsha boryshtardy tóleý merzimin uzartý jáne ony qaıta qurylymdaý máselesin pysyqtaýy qajet. Jalpy, jaǵdaı baqylaýda. Jetkilikti kólemde ónim jınalady. Qazaqstandyqtar nansyz qalmaıdy», - dep toqtaldy Álıhan Smaıylov.

Buǵan qosa Premer-Mınıstr bıyl mal azyǵyn daıyndaý men sýarý júıelerine arnalǵan tehnıka alý úshin «QazAgroQarjy» kompanııasynyń jarǵylyq kapıtalyn ulǵaıtý úshin 20 mlrd teńge bólingenin atap ótti.