Qurǵaq shóp órti Aqtóbe oblysynda saıajaı úılerin sharpydy

AQTÓBE. QazAqparat – Aqtóbe oblysy Alǵa qalasynda qurǵaq shóp janyp, saıajaı aýmaǵyna tarap ketti. Barlyǵy 10 úı órtendi, dep habarlaıdy QazAqparat tilshisi.

Búgin saǵat 14:15-te Alǵa qalasyndaǵy baý-baqsha qoǵamdastyǵynyń aýmaǵynda qurǵaq shóp tutandy. Oqıǵa ornyna jetken órt sóndirýshiler jalyn saıajaı úılerine tarap jatqanyn anyqtaǵan.

«Saıajaı aýmaǵynda 59 úı bar. Onyń 10-y órtendi. Bul úılerde adam turmaıdy, tek baý-baqsha daqyldary egiledi. Zardap shekkender joq. Órtti sóndirýge Tótenshe jaǵdaılar departamentinen 26 adam jáne 5 tehnıka jiberildi. Al jergilikti atqarýshy organdardan 10 adam men 3 tehnıka jumyldyryldy. Órt saǵat 16:30-da aýyzdyqtaldy. Qazirgi kezde ottyń shyǵý sebebi anyqtalyp jatyr», - dep habarlady oblystyq TJD baspasóz qyzmetinen.
Eske salsaq, búgin saǵat 10.40-ta Aqtóbedegi qoqys polıgonynan taǵy órt shyqty. Oblystyq TJD baspasóz qyzmeti «Tabys Aqtóbe» JShS-ǵa tıesili qatty turmystyq qaldyq polıgonynyń aýmaǵynda qoqys jáne qurǵaq shóp janyp jatqanyn habarlady.

«Sóndirý jumystaryna órt sóndirý bólimderi jáne «Tabys Aqtóbe» JShS-dan, Oman sharýashylyǵynan jalpy 46 qyzmetker men 21 tehnıka tartyldy. Qoqystyń byqsýyn joıý jáne qummen jabý jumystary júrgizilip jatyr»,- dep habarlady vedomstvonyń baspasóz qyzmetinen.