Kúresten Azııa chempıonatynda qazaqstandyqtar qansha medal jeńip aldy
Atalǵan qurlyqtyq dodadan kúrestiń úsh túrinen (grek-rım, erkin jáne áıelder kúresi) Qazaqstan quramasy 19 medal (5 altyn, 2 kúmis, 12 qola) jeńip aldy.
Áýeli jarysty grek-rım kúresiniń sheberleri bastaǵan bolatyn. Baqtııar Baıseıitov úmit artyp, aparǵan 10 balýannyń beseýi júldeger atanyp, jalpykomandalyq esepte úshinshi orynǵa turaqtady.
Atap aıtsaq, «klassıkterden» Tamerlan Shadýkaev (77 keli) el qorjynyna alǵashqy altyndy salsa, Ibragım Magomadov (72 keli) alǵashqy kúmis júldeni syılady. Al Horlan Jaqansha (55 keli), Azamat Kústibaev (87 keli) jáne Mansur Shadýkaevtar (130 keli) el qorjynyn qola medaldarmen tolyqtyrdy.
Grek-rım jarysy aıaqtalǵannan keıin, bozkilemge áıelder kúresiniń sheberleri shyqqan bolatyn. Nurlan Amanqosov baptaıtyn burymdy balýandar bul joly bapkeriniń senimin tolyǵymen aqtady. Olaı deıtinimiz, áıelder kúresinen Qazaqstan quramasy araǵa alty jyl salyp Azııa birinshiliginen bir emes, eki birdeı altyn medal jeńip aldy.
Aıtalyq, 53 keli salmaqta Tatıana Amanjol alty jyldan keıingi alǵashqy altyn medaldi ıelense, Jámıla Baqbergenova (72 keli) da qarsylas shaq keltirmeı ekinshi altyndy el qorjynyna saldy. Sonymen qatar, Aıaýlym Qasymova (62 keli) fınalǵa deıin jetip, kúmis medal ıegeri atandy. Al Valentına Islamova (50 keli), Marına Zýeva (55 keli), Aıaýlym Qasymova (57 keli), Mádına Baqbergenova (59 keli), Elmıra Syzdyqova (76 keli) bastaǵan balýandarymyz úzdik úshtikten kórinip, qola medal ıegerleri atandy.
Osylaısha, balýan qyzdarymyz 2 altyn, 1 kúmis, 5 qola medal jeńip aldy.
«Saryqurlyq» dodasyn sońǵy bolyp erkin kúres sheberleri túıindedi. Áset Serikbaev baptaıtyn erkin kúres sheberleri de el úmitin aqtaı bildi. Olar da el qorjynyna eki altyn, tórt qola júldeni saldy.
Naqtyraq aıta ketsek, erkin kúresten 74 keli salmaqta el namysyn qorǵaǵan Danııar Qaısanov Azııa chempıony atandy. Ol osy jeńisinen keıin «eki dúrkin Azııa chempıony» degen atqqa qol jetkizdi. Ol ótken jyly qytaıda ótken Azııa chempıonatynda da bas júldeni jeńip alǵan bolatyn. Ekinshi altyndy ıÝsýp Batyrmýrzaev (125 keli) el qorjynyna saldy.
Sondaı-aq, Dáýlet Nııazbekov (65 keli), Meıirjan Ashırov (70 kg), Ilıshan Chılaev (92 keli) pen Álisher Erǵalı (97 keli) qol medal ıegerleri atandy.
Osylaısha Úndistan astanasy Nıý-Delıde kúres túrlerinen ótken Azııa birinshiliginde Qazaqstan quramasy jalpy 19 medal (5 altyn, 2 kúmis, 12 qola) jeńip aldy.