Kúresten álem chempıonatynda Qazaqstan taǵy eki medal aldy

<p>ASTANA. KAZINFORM &mdash; Iordanııa astanasy Amman qalasynda 17 jasqa deıingiler arasynda kúres túrlerinen ótip jatqan álem chempıonatynda Qazaqstan quramasy qos qola medalǵa qol jetkizdi.</p>

Bul joly áıelder kúresinen Anna Stratan men Uldana Tileýhan kózge tústi.

Anna Stratan 57 kelige deıingi salmaqta grekııalyq Merı Manıdi 5:1 esebimen tize búktirdi.

Uldana Tileýhan (65 kg) qola júlde úshin básekede beıtarap sportshy, ótken jylǵy Eýropa chempıony Anastasııa Komanovany 17:2 esebimen utty. 

Buǵan deıin grek-rım kúresinen Alpamys Bolatuly (51 kg) men Erkebulan Anapııa (80 kg) kúmis júldeger atanǵan edi.

Eske sala keteıik, budan buryn álem chempıonatynda grek-rım kúresinen eki qazaqstandyq balýannyń kúmis alǵanyn jazǵan bolatynbyz.