«Kýrchatov Vodokanal» tazartylmaǵan káriz sýyn Ertiske júıeli túrde aǵyzyp kelgen

<p>PAVLODAR. KAZINFORM &mdash; Ertis ózenine kárizdiń qaldyq sýlaryn tolassyz jiberip jatqan Kýrchatov qalasynyń kommýnaldyq mekemesi buǵan deıin birneshe márte jaýapkershilikke tartylǵan. Jyl basynan kásiporyn ekologııalyq zańnamalardy buzǵany úshin 10 mln teńgeden astam aıyppul tólegen.</p>

— Abaı oblysy boıynsha ekologııa Departamentiniń qyzmetkerleri Abaı oblysynyń Tabıǵı resýrstar basqarmasynyń ókilderimen, Kýrchatov qalasynyń turǵyn úı-kommýnaldyq sharýashylyq bóliminiń basshysymen, sondaı-aq «Kýrchatov vodokanal» MKK dırektorymen birlesip káriz sýy quıylyp jatqan tusyna bardy. Aýmaqty zerdeleý barysynda atalǵan tógindi sý «Kýrchatov vodokanal» MKK-na tıesili ekeni anyqtaldy. Kásiporynnyń aǵyndy sýlardy tazartý kesheninen Ertis ózenine quıatyn káriz qubyry jarylǵany anyqtalyp, sýdyń túsi surǵylt reńkke aınalǵany baıqaldy, biraq nájis tabylmady. «Kýrchatov vodokanal» MKK dırektory bul buzýshylyq jaqyn arada joıylatynyn aıtty, — dep habarlady Abaı oblysy boıynsha ekologııa departamentinen.

Belgili bolǵandaı, «Kýrchatov Vodokanal» mekemesine bıyl birneshe márte josparly tekserý júrgizilip, birqatar zań buzýshylyqtar anyqtalǵan. Alǵashqy tekseriste káriz júıesindegi sýdy tazartqyshtar bıologııalyq tazartýdy jetkilikti deńgeıde júrgizbeıtini málim bolǵan. QR Ekologııa kodeksiniń 90-baby boıynsha ákimshilik is qozǵalyp, uıymǵa 258 440 teńge aıyppul salynǵan. 

Al kelesi tekseristiń qorytyndysynda jasalǵan hattamada (2024 jyldyń 11 sáýiri, № 18 hattama) Shyǵys Qazaqstan oblysy boıynsha ekologııa departamentiniń zerthanalyq-taldaý baqylaý bóliminiń mamandary aǵyndy sýlardy Ertiske jiberetin № 2 qubyrda káriz qaldyqtarynyń mólsheri óte kóp ekenin anyqtaǵan. Ondaǵy qaldyq mólsheri ekologııalyq ruqsat sheginde belgilenetin qorshaǵan ortaǵa emıssııalar normasynan asyp túsken. Osyǵan oraı kásiporyn 9 817 439 teńge aıyppul tólengen.

Qazirgi ýaqytta Abaı oblysy ekologııa departamentini mamandary «Kýrchatov vodokanal» MKK-ǵa qatysty jospardan tys tekseris taǵaıyndaý boıynsha jumystardy júrgizip jatyr.

Eske sala keteıik, Ertiske Kýrchatov qalasynyń káriz sýy aǵyp jatqany týraly jazǵan edik. Ertistiń sýyn aýyzsý retinde Pavlodar, Ekibastuz, Aqsý qalalarymen qosa, Qaraǵandy oblysy da paıdalanyp otyr. Sátbaev atyndaǵy kanal arqyly aǵatyn ózen sýy jaqyn jyldary Astana qalasyna deıin jetedi degen jospar bar.