Qurbandyq shalatyn oryndar «Ashyq» qosymshasymen jumys isteıdi

NUR-SULTAN. QazAqparat – Bıyl qurbandyq shalatyn arnaıy oryndarda «ASHYQ» mobıldi qosymshasy iske qosylady. Bul týraly QMDB tóraǵasynyń orynbasary, naıb múftı Ershat Ońǵar aıtyp berdi, dep habarlaıdy QazAqparat tilshisi.

«Sary» jáne «jasyl» aımaqtaǵy qurbandyq shalatyn arnaıy oryndarda azamattardyń densaýlyǵyna erekshe kóńil bólý jáne qoǵamdyq qaýipsizdikti qamtamasyz etý maqsatynda «Ashyq» mobıldi qosymshasy iske qosylady. Atap aıtqanda, «qyzyl» jáne «sary» mártebesi bar azamattar qurbandyq shalý oryndaryna jiberilmeıdi, «kók», «jasyl» mártebesi bar azamattar ǵana jiberiledi», - dedi E. Ońǵar.

Osy rette, Nur-Sultan, Almaty jáne Shymkent qalalary, oblystardyń ákimdikteri Іshki ister, densaýlyq saqtaý mınıstrlikteri, QMDB-men birlesip, elimizdiń óńirlerinde «Ashyq» mobıldi qosymshasy aıasynda qoǵamdyq qaýipsizdikti qamtamasyz etedi.

«Qasaphanaǵa maska taǵyp, araqashyqtyq saqtap, dene qyzýy bar adamdardyń jaqyndaýyna jol bermeýge tıispiz. Jasy 65-ten asqan qarııalar, áıelder men balalardyń barynsha qurban malyn shalatyn oryndarǵa barýyn shekteýge shaqyramyz. Qazirgi ýaqytta qasaphanaǵa qoıylatyn tártip joǵary. Ony udaıy baqylap, kelýshilermen aradaǵy baılanysqa jiti mán berýimiz kerek. Eń bastysy maldy sharıǵat talaptaryna sáıkes baýyzdap, soıylýyn qatań qadaǵalaý qajet», - dedi Ershat Ońǵar.

Aıta keteıik, 2021 jyly qurban shalý rásimi eki jolmen júzege asyrylady. «Sary» jáne «jasyl» aımaqtarda onlaın jáne oflaın formatta ótse, «qyzyl» aımaqtarda pandemııa jaǵdaıynda sharıǵattaǵy «ókildik» qaǵıdasyna sáıkes, qurban2021.kz saıty arqyly tek onlaın rejımde qurban shalynady.