Qurban aıttyń birinshi kúni atyraýlyqtar qoǵamdyq kólikte tegin júredi
Atyraý qalalyq ákimdiginiń baspasóz qyzmetinen málim etkendeı, shahar basshylyǵy men jolaýshy tasymaldaıtyn kompanııalar osyndaı sheshim qabyldaǵan.
«Qurban aıt meıramynyń alǵashqy kúni – 28 maýsymda qoǵamdyq kólikter shahar turǵyndary men qonaqtary tegin júredi. Qoǵamdyq kólikter kestege sáıkes tańerteńnen keshke deıin jolaýshylardy tegin tasymaldaıdy. Jolaýshylardyń jas aıyrmashylyǵyna shekteý qoıylmaıdy. Ákimdik pen jolaýshy tasymaldaıtyn kásiporyndardyń ortaq sheshimimen qabyldanǵan bul múmkindikti jas aıyrmashylyǵyna qaramastan jolaýshylardyń bári paıdalana alady», -dep habarlady ákimdiktiń baspasóz qyzmeti.
Qazir Atyraýda jolaýshy tasymaldaýmen aınalysatyn birneshe kásiporyn bar. Qala men oǵan taıaý mańda ornalasqan eldi mekenderge jolaýshy tasymaldaý úshin kún saıyn 240 avtobýs jolǵa shyǵady.
Eske sala ketelik, Atyraýda Qurban aıtta 14 kıiz úı tigilip, 10 myń balaǵa syılyq beriletinin jazǵan bolatynbyz.
Atyraý oblysynyń bas ımamy Altynbek Utyshanulynyń aıtýynsha, erteń, 28 maýsymda Qurban aıt meıramy keń aýqymda atalyp ótedi.
«Qasıetti Qurban aıt eldiń birligin nyǵaıtyp, ózara baýyrlastyqty arttyrady. Aıt kúnderi shamasy jetken adam qurbandyq shalady. Bıyl Atyraý qalasyndaǵy Isataı-Mahambet ortalyq alańynda Qurban aıt merekesine oraı 14 kıiz úı tigiledi. Jergilikti ónerpazdar óner kórsetedi. Turǵyndar aıtyskerler men kúıshilerdiń ónerin tamashalaıdy. Óńirdegi meshitter 10 myń balaǵa arnaıy syılyq úlestiredi. Nıet etip, shalynǵan qurban malynyń eti áleýmettik turmysy tómen toptaǵy otbasylarǵa taratylady», - dep málim etti Altynbek Utyshanuly.