Qurban aıtta Almaty oblysy turǵyndary qaýly talaptaryn saqtaýy tıis

QONAEV. QazAqparat – Almaty oblysynyń turǵyndary arasynda SOVID-19 jáne jiti ishek ınfektsııalarynyń taralýyna jol bermeý maqsatynda óńirdiń Bas memlekettik sanıtarııalyq dárigeri Erǵalı Sydymanovtyń qaýlysy jarııalandy. Qaýly talaptary 8-11 shilde aralyǵynda, ıaǵnı Qurban aıt kezinde saqtalýy tıis, dep habarlaıdy QazAqparat tilshisi.

Qaýly mátini boıynsha, oblystyń qalalary men aýdandarynyń ákimderine, polıtsııa departamenti, din isteri basqarmasy, Veterınarııalyq baqylaý jáne qadaǵalaý jónindegi aýmaqtyq ınspektsııa, sondaı-aq aımaqtyń bas ımamyna kelesi talaptardy qamtamasyz etý mindetteledi:

1) maldy avtomashınalardan jáne jeke menshik úı ıelikterinen ótkizýge tyıym salý;

2) veterınarııalyq qyzmettiń resmı veterınarııalyq-sanıtarııalyq qorytyndysyn alǵan soıý pýnktteri men alańdarda (veterınarııalyq qyzmet bekitken tizbege sáıkes aýdandardaǵy soıý pýnktteri, alańdar) mal soıýdy jáne ótkizýdi uıymdastyrý;

3) mal soıýdy veterınarııalyq anyqtama bolǵan jaǵdaıda ǵana júrgizý;

4) oblystyń barlyq aýmaǵyndaǵy soıý pýnktterinde kúsheıtilgen memlekettik veterınarııalyq-sanıtarııalyq baqylaý jáne qadaǵalaý;

5) Qurban2022.kz saıtqa ótinim bere otyryp, onlaın rejımde qurbandyq shalýdy uıymdastyrý múmkindigi týraly halyqpen túsindirý jumysyn júrgizý;

6) tońazytqysh jabdyqtardyń, refrıjeratorlardyń jáne jeke qorǵanys quraldarynyń qajetti sanyn qamtamasyz ete otyryp, muqtaj adamdarǵa tez buzylatyn ónimderdi (qurbandyqqa shalynǵan maldyń etin) tasymaldaý jáne saqtaý jónindegi sanıtarııalyq-epıdemıologııalyq qaǵıdalardyń talaptaryn saqtaý.

Sondaı-aq, jiti ishek ınfektsııalarynyń jáne tamaqtan ýlanýdyń aldyn alý maqsatynda Almaty oblysynyń turǵyndary men qonaqtaryna usynylady:

1) qoǵamdyq tamaqtaný obektilerinde (toıhana, meıramhanalar, dámhanalar, ashanalar, meshitter jáne t.b.) jáne salttyq is-sharalardy ótkizý boıynsha qyzmet kórsetetin obektilerde ártúrli is-sharalardy ótkizý kezinde úıde daıyndalǵan taǵamdardy paıdalanbaý;

2) tez buzylatyn ónimderdi tek sýyq jaǵdaıda ǵana saqtaý. Azyq-túlik ónimderin, ásirese sút, salattar satyp alǵanda, jaramdylyq merzimine, shyǵarylǵan kúnine nazar aýdaryńyz, daıyndalǵan taǵamdy bólme temperatýrasynda 2 saǵattan artyq qaldyrmaý;

3) tek taza qaptamany (polıetılen, tamaq ónimderine arnalǵan konteınerler jáne t.b.) paıdalaný, qoqys pen tamaq qaldyqtaryn jınamaý, shybyndar men taraqandardyń paıda bolýyna jol bermeý;

4) kezdeısoq adamdardan nemese sanktsııalanbaǵan saýda oryndarynan tamaq ónimderin satyp almaý;

5) jańa daıyndalǵan taǵamdy aldyńǵy kúnniń qaldyqtarymen aralastyrmaý, biraq eger daıyn taǵam kelesi kúnge qalsa, onda ony qoldanar aldynda termııalyq óńdeýden ótkizý (qaınatý nemese qýyrý).

6) turǵyn úıdi únemi taza ustaý jáne jeke gıgıena erejelerin saqtaý, kishkentaı balalarǵa qaınatylmaǵan sút, shıki jumyrtqa bermeý, tamaq daıyndaý úshin tek jańa ónimderdi paıdalaný.

Qaýly 7 shildeden bastap kúshine enedi.